Сыр бойы

Футболдан Қазақстан чемпионатының екінші лигасында ойын көрсететін Қызылорданың екінші командасы «Байқоңыр» Оңтүстік аймақтық топтың жеңімпазы атанып, финалдық кезеңге жолдама алды. Енді бір рет «әуп» десе, Құттыбай Досманбетов бастаған «Байқоңыр» келесі жылы бірінші лигада ойын көрсету құқығына ие болады. Олардың алдына келер жылы бірінші лигада бақ сынау мақсаты қойылған. Финалдық кезең қыркүйек айында Қызылордада өтеді деп күтілуде.

Жалағаш ауданда балаларға қосымша білім беру жұмыстарына тұрақты түрде көңіл бөлінеді. Осы мақсатта оқушылар үйі, әуез мектебі, № 202 орта мектеп жанындағы қосымша білім беру орталығы, спорт мектебі және аула клубтарында түрлі жобалар іске асырылуда. Осы мақсатта ауданда семинар болып өтті. Семинарға барлық Қызылорда қаласы мен аудан әкімінің орынбасарлары, білім бөлімінің басшылары, мектеп директорлары, қосымша білім беру ұйымдарының басшылары қатысты.

Қазалы ауданында «Бос жұмыс орындары» жәрмеңкесі өткізілді. Жәрмеңкеге жұмыссыздармен қатар жұмыс іздеуші мүмкіндігі шектеулі жандарда шақырылды.

Қармақшы ауданында орналасқан көпұлтты «ІІІ Интернационал» ауылында он төрт ұлттың өкілдері қоян-қолтық бірге өмір сүріп, бірге еңбек етіп келеді. 

Сырдария ауданында ұлттық ойындарды халық арасында кеңінен насихаттауға мән беріліп келеді. Осы мақсатта ауданда көкпар ойыны болып өтті. 

Қармақшы ауданы Алдашбай ахун ауылының тұрғыны, үшнші топтағы мүмкіндігі шектеулі азаматша Айткүл Атеева "Ақниет" бағдарламасы аясында 325 мың теңге көлемінде грант жеңіп алып, өз тіршілігін жүргізіп отыр.

Жаңақорғандық талантты бойжеткен, мүмкіндігі шектеулі Ақнұр Сматованың шығармашылық ән кеші өткізілді. Дүйім жұрттың алдында әсем ән шырқап, жиналғандардың көңілін бір серпілтті. 

Шиелі ауданындағы халыққа қызмет көрсету орталығы Қазақстан Республикасының «Электронды Үкімет» порталының қол жетімділігі мен айқындылығын насихаттау мақсатында Шиелі аудандық емханасында www.e-gov.kz, Қазақстан Республикасының «Электрондық үкімет» порталын пайдалану мен оның мүмкіндігін түсіндіру акциясын өткізді. 

Жаңақорған ауданында 27 сәуір, жексенбі күні 12 сағаттан астам толассыз жауған жауыннан Бесарық ауылдық округіне қарасты Кеңес және Бесарық ауылын жалғайтын ауыл ішілік автомобиль жолын су шайып өтті. 

Қызылорданың «Қайсар» командасы ойын өрнегін енді тапқан секілді. Биыл командаға көптеген футболшылар қосылды. Соның салдарынан маусым басында жерлестеріміз азбап кібіртіктеп қалғандай болып еді.