Төтенше жағдай кезінде мерзімі өтіп кеткен құжаттар 10 шілдеге дейін жарамды - ІІМ

Жарамдылық мерзімі өткен құжаттарды ауыстыру биыл 10 шілдеге дейін айыппұл санкцияларынсыз жүзеге асырылады, деп хабарлайды ҚазАқпарат Polisia.kz-ке сілтеме жасап.

Елімізде төтенше жағдай режимін енгізгеннен кейін ХҚКО жұмысы 26 наурыздан бастап тоқтатылды және бірқатар мемлекеттік қызметтер, оның ішінде жеке куәлікті қайта рәсімдеу бойынша қызмет көрсетілмеді.

Төтенше жағдайды енгізу форс-мажорлық жағдай деп танылады, сондықтан ҚР Үкіметі азаматтардың кейбір құжаттарын жарамды деп тану туралы қаулы қабылдады:

1) «Жеке басты куәландыратын құжаттар туралы» Заңның 6-бабында көрсетілген жеке басын куәландыратын құжаттар;

2) жүргізуші куәліктері, оның ішінде міндетті техникалық байқаудан өту туралы уақытша куәліктер;

3) азаматтық және қызметтік қару және оның патрондарын сатып алуға, сақтауға және алып жүруге рұқсаттар;

4) кіруге және кетуге арналған рұқсаттар (визалар), Қазақстан Республикасында уақытша және тұрақты тұруға арналған рұқсаттар, еңбекші көшіп келушіге және шетелдік жұмыс күшін тартуға жұмыс берушіге рұқсаттар, пана іздеуші адамның куәлігі.

Жарамдылық мерзімі төтенше жағдай кезеңінде өткен жоғарыда көрсетілген құжаттар төтенше жағдай жойылған күннен бастап күнтізбелік алпыс күн ішінде, яғни биыл 10 шілдеге дейін жарамды деп танылады.

Төтенше жағдай режимі кезінде және ол аяқталған күнінен бастап күнтізбелік 60 күн ішінде он алты жасқа толған және жеке басты куәландыратын құжат алмаған азаматтар үшін туу туралы куәлік немесе Қазақстан Республикасы азаматының паспорты көрсетілген кезеңде жеке басын куәландыратын негізгі құжат болып табылады.
ЖЕДЕЛ ЖАҢАЛЫҚТАР 12 мамыр 2020 г. 264 0