Сыр бойы

Жалағаш. Аудан бойынша 2013 жылы пайдалануға берілген тұрғын үй көлемі 8426,3 шаршы метр, 2012 жылмен салыстырғанда 101,2 пайызға артып отыр. 

Қармақшы. ҚР Денсаулық сақтау министрлігінің іс-шара жоспарына сәйкес медицина қызметкерлерінің білімдерін жетілдіру мақсатында Алматы қаласындағы С.Аспандияров атындағы Қазақ Ұлттық медициналық университетінің «Дипломнан кейінгі терапия бағытындағы білім жетілдіру» кафедрасының меңгерушісі, медицина ғылымдарының докторы, профессор Гүлнар Ғабдуәлиқызы Беделбаева жуырда ауданымызға жұмыс сапармен келді. 

Қазалы. Ауданында өнерлі өрендердің талантын шыңдау, шығармашыл жас буынды елге таныстыру мақсатында «Әнші балапан» байқауы өткізілді. Сайысқа 40-тан аса талапкер қатысты. 

Арал. Аудан әкімі Мархабат Жайымбетовтың төрағалығымен қаладағы № 262 мектеп – гимназия базасында білім бөлімі кеңесінің кеңейтілген мәжілісі өтіп, ҰБТ-ға дайындық барысы пысықталды. 

Қызылорда. 2013-2014 жылғы қысқы жылу маусымы 15 сәуір күні  аяқталды. Бұл жөнінде қала әкімінің кеңесшісі Роза Боханова мен «Қызылордажылуэлектрорталығы» мекемесі директорының орынбасары наурыз Сатханов БАҚ өкілдеріне арналған баспасөз мәслихатында хабарлады.  

Қызылорда. Үстіміздегі жылғы 21 cәуірден бастап республика аумағында тұрғындарда заңсыз сақтаудағы атыс қаруын, оқ-дәрілер мен жарылғыш заттарды сатып алу бойынша кезекті акция өткізіледі. Атыс қаруы мен жарылғыш заттарды қолдана отырып жасалатын қылмыстар мен құқық бұзушылықтардың алдын алу мақсатында Қазақстан Республикасы Үкіметінің 2007 жылғы 26 желтоқсандағы № 1299  қаулысымен бекітілген «Азаматтардың заңсыз сақталудағы атыс қаруын, оқ-дәрілер мен жарылғыш заттарды ерікті түрде өтеусіз тапсыру ережесіне» сәйкес жүргізіледі. 

Қызылорда облысының кәсіпкерлер палатасында өңірлік кәсіпкерлер кеңесінің отырысы өтті. Күн тәртібінде «Бизнестің жол картасы – 2020»,  «Агробизнес – 2020» кәсіпкерлерді қолдау мемлекеттік бағдарламаларының Қызылорда облысы бойынша жүзеге асырылуы 2013 жыл ішінде  және 2014 жылға арналған жоспар нәтижелері, «Ауыл шаруашылық Кредиттік Серіктестігі» АҚ-ның ағымдық жұмыстары, несие алу барысындағы құжаттар тізімінің азайтылуы және кепіл құны сияқты  әкімшілік сұрақтар мәселелері талқыланды.

Ертең, 19 сәуір күні Қызылорда облыстық ішкі істер департаментінде ішкі істер органдарының жас қызметкерлері, олардың тәлімгерлері және ата-аналарына арналған слет өтпек.  Дәстүрлі  түрде өтетін бұл шараның мақсаты – ішкі істер органдарына енді ғана қабылданған жас қызметкерлерін, департаменттің жеке құрамын отансүйгіштікке, патриоттық өнегеге тәрбиелеу болып табылады.