Сыр бойы

Басқарма басшысы Елбасының биылғы Жолдауынан туындайтын міндеттерге тоқталды. Негізгі бағыттар облыс әкімінің іс-қимыл жоспарына енгізілді. Әсіресе, жұмысшылардың жаппай жұмыстан босатылуына жол бермеу, жаңа жұмыс орындарын құру, экономиканы әртараптандыру, тірек елді мекендерді дамыту – басты назарда. Жолдауда мемлекеттік-жекеменшік әріптестікті дамыту жүктелді. Дүниежүзілік тәжірибеге сүйенсек, бұл – инвестиция тартудың тиімді құралы әрі кәсіпкерлікті дамытуда да әлеуеті зор. 

– Экономикалық күрделі кезеңде онсыз да шектеулі бюджетіміздің салмағын жеңілдету үшін мемлекеттік-жекеменшік әріптестікті жолға қою өте қолайлы. Осылайша денсаулық сақтау, спорт, мәдениет, энергетика, жолаушылар көлігі салаларында 15 жобаны іске асыру жоспарланып отыр. Жуырда Қызылорда қаласындағы «Тарлан» дене шынықтыру-сауықтыру кешеніне сервистік қызмет көрсету жобасы бойынша келісімшартқа қол қойылды. Сәуір айында облыс орталығында ауысымына 400 келушіге арналған емхана ашу бағытында жеке әріптеспен келісім жасалады, – деді С.Құлымбетова. 

Брифингте жекешелендірудің екінші толқыны аясында атқарылған жұмыстар мен алдағы міндеттер туралы облыстық қаржы басқармасының басшысы Талғат Жақыпбаев мәлімдеді. Былтыр тізімдегі 5 нысан жекешелендірілді. Облыстық салауатты өмір салтын қалыптастыру орталығы саудаға бірнеше мәрте шығарылды. Процесс ұзақ жүрді. Алдағы екі жылда 6 ұйымды бәсекелес ортаға беру жоспарланған. Тізімде Қорқыт Ата әуежайы, «Байқоңыр» корпорациясы, «Сырдария» балалар сауықтыру лагері де бар. 

– Жекешелендірудің жариялылығы мен тиімділігін қамтамасыз ету үшін облыс әкімдігі жанынан тұрақты комиссия құрылды. Ұсынылған әрбір объектінің іске асыру мерзімдері бекітілді, – деді басқарма басшысы.