Сыр бойы

Қазақстан халқы тілдерінің күні мерекесіне орай Қызылорда қаласындағы «Достық» үйінде «Тіл – татулық тірегі» атты облыстық фестиваль болып өтті. Облыстық ішкі саясат басқармасының ұйымдастыруымен өткен шара Тәуелсіздіктің 25 жылдығына арналды.  Оған облыс әкімінің орынбасары Руслан Рүстемов, аймақтағы зиялы қауым өкілдері, тіл жанашырлары, жоғары оқу орындарының басшылары, мұнай компаниялары мен этномәдени бірлестік өкілдері қатысты. 

Алдымен облыс әкімінің орынбасары Руслан Рүстемов барша жи­налған қауымды айтулы мерекемен құттықтап, жылы лебізін біл­дірді. 

Қазақ тілі – ата-бабамыздан бе­рі­ліп келе жатқан үлкен мұра. Оның қасиеті мен қадірі баға жетпес байлық. Ол баршамыздың бойы­мызға ана сүтімен дарып, сіңеді. Мемлекеттік тіліміздің одан әрі дамып, өркендеуі үшін баршамыз өз үлесімізді қосудан жалықпауымыз керек,-деді облыс әкімінің орынбасары Р.Рүстемов. 

Мұнан кейін ­фестивальда об­лыстағы бірқатар тіл жан­ашыр­лары Қазақстан халқы Ассам­блеясының құттықтау хатымен, ҚР Мәдениет және спорт министрлігі Тілдерді дамыту және қоғамдық-саяси жұмыс комитетінің, облыстың Құрмет грамо­талары және  Алғыс хаттармен марапатталды. Сонымен қатар этномәдени бірлестіктер  арасында өткізілген «Мемлекеттік тіл – менің тілім» атты облыстық байқауының жеңімпаздарына да Алғыс хаттар  мен бағалы сыйлықтар табыс етілді. 

Өткізіліп отырған шара  мере­келік шашу ретінде концерттік бағ­дарламаға ұласты. Онда этномә­дени бірлестіктер өздерінің ән-билерін орындап, көпшіліктің ыс­тық ықы­ласына бөленді. Сонымен бірге ҚР Еңбек сіңірген әртісі Күлән Қалымбетова, облыстық филармония әншілері мен «Тұран» триосы ән-жырдан шашу шашты. 

Шараға жиналғандар  «Тіл – ұлт­тың рухани қазынасы» атты кітап көрмесін де тамашалады. 

Жалпы, тіл  мерекесіне орай об­­лыста түрлі-іс шаралар жоғары деңгейде аталып өтілді. Мәселен, отбасы үлгісіндегі ­«Атамекен» балалар ауылында «Тілді сүю – тал­бесіктен» акциясы өтсе, об­лыстық білім басқармасының ­мамандары, тіл жанашылары, мектеп директорлары мен тілдерді дамыту орта­лығының қызметкерлерінің қаты­суымен «Үш тілді білу – заман талабы» атты тақырыпта «дөңгелек үстел» ұйымдастырылды. Сондай-ақ, қоғамдық көліктерде «Тіл таза­лы­ғын сақтайық!» акциясына көп­шілік белсенді қатысты. 

Фестиваль тіл жанашырларының ұранына айналған «Жаса, жаса, қазақ тілім» патриоттық әнімен қо­рытындыланды.