Сыр бойы

Арал ауданында «Қамбаш» балаларды сауықтыру және қосымша білім беру орталығында ұстаздар балы өтті. Шара барысында мұғалімдер арасындағы пән олимпиада жеңімпаздары анықталды.

Аудандық пән олимпиадасы өткен жылдан бері өткізіліп келеді. Биыл Қазақ хандығының 550 жылдығына орай тарих пәні мұғалімдерінің арасында ұйымдастырылды. Нәтижесінде бас жүлдені №57 мектептің мұғалімі Іңкәр Әбішева иеленіп, аудан әкімі Абзал Мұхимов автокөлік кілтін табыстады. Екінші орынды жеңіп алған №59 мектеп мұғалімі Жетес Әйтімов пен үшінші орын иегері №20 мектеп мұғалімі Сәндігүл Жұбаеваға қомақты сыйақы табыс етілді. Бұдан өзге, олимпиадада арнайы дипломмен марапатталған бес мұғалімге 20 мың теңге көлемінде сыйлық берілді. Бұл туралы облыстық әкімдіктің баспасөз қызметі хабарлады.

- Ұрпақтың жұлдызын жағып, мәртебесін биіктететін де, тағылымын қалыптастырып, танымын кеңейтетін де - ұстаз. Болашақтың данасын да, дарасын да ата-анадан кейін, ұстаз тәрбиелейді. Сондықтан, мұғалімнен өнеге-білім алған кез-келген шәкірт ұстазымен мақтанады. Сіздерді мерейлі мерекелеріңізбен шын жүректен құттықтай отыра, шәкірттеріңіз биік шыңдарға шыға берсін деген тілек білдіремін», - деп аудан әкімі А.Мұхимов мерекелік лебізін жеткізді.