Сыр бойы

Жалпы, штабты құрудағы негізгі мақсат - Елбасы тапсырмасымен облыста азық-түліктің және тұрмысқа қажетті тауарлар бағасының негізсіз өсуіне жол бермеу. Осылайша, ол еліміздің жаңа экономикалық саясатқа көшуі тұсында жағдайды қалыпты ұстауға жұмыс жасайды.

Штаб құрамында ауыл шаруашылығы, экономика, кәсіпкерлік, энергетика, ішкі саясат басқармаларының басшылары және статистика, монополияны реттеу саласының, сондай-ақ құқық қорғау органдарының өкілдері бар.

Түс ауа штаб мүшелері жергілікті тауар өндірушілермен, кәсіпкерлермен және ірі-ірі сауда орталықтарының басшыларымен кездесіп, бағаны тұрақты ұстау мәселелерін талқылады.

- Күніне екі рет барлық әлеуметтік маңызды тауарларға баға мониторингі жүргізілуде. Дүкендерде баға көтеру орын алған жоқ, біз бақылап отырмыз. Қымбаттауы мүмкін деген сырттан әкелінетін өнімдерге талдау жүргіздік. Қордағы тауар жеткілікті. Сондықтан алаңдаудың қажеті жоқ. Ең бастысы - нанның бағасы негізсіз өспейді. Егін жинау науқаны аяқталуға жақын. Министрлікпен де бұл мәселені ақылдастық. Өңірге уақытылы ұн жеткізіліп тұратын болады. Өтпелі кезеңде жұдырықтай жұмыла білуіміз керек, - деді облыс әкімінің орынбасары Серік Қожаниязов.

Жергілікті кәсіпкерлер де жағдайға түсіністікпен қарап, бағаны тұрақты ұстау жөніндегі ұсынысқа келісіп отыр. «Қаржы компаниясы» ЖШС директоры Дамир Кәмешев «Байқоңыр» ӘКК жанынан құрылған «Дәмді» әлеуметтік дүкендерінде азық-түлік тауарларының қоры жеткілікті екендігін, сондықтан негізгі азық-түлік өнімдерінің бағасының өсуіне ешқандай қауіп болмайтындығын айтты.

Штаб мүшелері жалпы нарықтағы бағаларға сағат сайын мониторинг жүргізіп, бағаның негізсіз өспеуін қадағалайтын болады.