Сыр бойы

Қызылордада облыстық тарихи-өлкетану музейінің ұйымдастыруымен «Жұлдызды қала – Астана» атты шара өтті.
Шара аясында асфальтқа сурет салу байқауы, «Астана – арман қала» тақырыбында фотокөрме болды. Сондай-ақ жасөнерпаздардың концерті жұртшылыққа көтеріңкі көңіл-күй сыйлады.
Мерекелік бағдарлама қызықты әрі мазмұнды өтті. Балалық қиялдан туған әрбір суретте өнерлі өрендер шабытына аялы атамекені, кеңбайтақ туған өлкесі, сұлулығына сөз жетпес айшықты қала Астана арқау болған.
– Астананы туған күнімен құттықтаймын. Мен бүгін Бәйтеректі салдым. Бәйтерек маған ұнайды, — дейді қаланың кішкентай тұрғыны Сымбат Албатыр.
Еліміздің жүрегі – Астананы барлық ынта-жігерімен, өз деңгейінде бейнелеген жас суретшілер марапатқа ие болды. Онан әрі қысқа мерзімде Елорданың жеткен жетістігін көрсету мақсатында музейдің көшпелі залын аралап, көптеген мағлұматқа қанықты.