Сыр бойы

Өңір басшысы Қырымбек Көшербаев қызылордалықтарды Наурыз мерекесімен құттықтады.

Қызылорда қаласындағы орталық алаңда Наурыз мерекесінің негізгі шаралары өткізіліп, оған облыс әкімі Қырымбек Көшербаев қатысты. Орталық алаңға тігілген 20-ға жуық киіз үйде салт-дәстүр жаңғыртылып, қолөнер шеберлерінің көрмелері ұйымдастырылды. Жастар жағы қыз бен жігіт айтысын жасап, жарапазан айтса, жергілікті өнерпаздар сахналық көрініс арқылы жаңа жылдың басталғанын айшықтайтын көріністер көрсетті. Сыр жұртшылығы жетi түрлi дәмнен жасалған наурыз көжеден дәм татты. Төс қағыстырып, амандық сұрасты. Алаңға келген қала тұрғындары мен қонақтары қазақша күрес, арқан тарту, асық және жамбы ату, гір тасын көтеру, қол күрес секілді жарыстарға белсене қатысып, тігілген жүлделерді ұтып алды, деп хабарлады облыс әкімінің баспасөз қызметі.

Өңір басшысы жиылған жұртшылықты Әз-Наурыз мерекесімен құттықтап, жылы лебізін білдірді.

- Күн мен түн теңесетін, өмірдің жылы лебі есетін, дүние ерекше өзгеретін, Жер ана өзгеше күйге енетін, ырыс пен берекенің, ризық пен несібенің бастауындай болған Әз Наурыз құтты болсын. Бүгінде Наурыз көп ұлтты халқымыздың сүйікті мейрамына айналып, бірлік пен ынтымақтың, саяси тұрақтылықтың нығаюының негізі болды. Өткен жылға өкпе жоқ, келер күннен үміт көп. Дегенмен, былтырғы жыл облыс үшін табысты жыл болды. Сыр диқандары екі жыл қатарынан рекордтық көрсеткіште өнім жинады. Экономиканың әр саласында өсім бар. Күні кеше «Нұр Отан» партиясының XVI съезінде Елбасы Қазақстанның даму көрсеткішін бір ғана Қызылорда облысының жетістіктерінен қарап бағалауға болады деді. Бұл біздің аймақ үшін берілген үлкен баға,- дей келе, облыс әкімі әрбір шаңыраққа береке мен молшылық тіледі.