Сыр бойы

Еріктілер жылы аясындағы шаралар ауқымды. Олардың ба­сым бөлігі қаржы көп шығын­далатын басқосуларға емес, аза­маттардың жеке ниеттерін ын­таландыруға бағытталып отыр. Қалалық «Qosyl» жастар ресурстық орталығы да осы іс­терге ұйытқы болуда. Жуырда Қызылорда қаласының ґкімі Нұрлыбек Нґлібаев орталықтың тыныс-тіршілігімен танысып, қала еріктілерінің тың бастамаларына куә болды. 

Шараны  «Жас Сарбаз» рес­пуб­ликалық қоғамдастық әскери-патриоттық қозғалысының  об­­лыстық жетекшісі Айдос Қо­жамұратов рапорт беруден бас­тады. Әрі қарай клуб мүшелері АК-74 қаруын бөлшектеп жинап, бүгінге дейін игерген әдістерін көрсетті. Мұнан соң орталық директоры Сабыржан Кеңшілік   орталық базасындағы волейбол, workout алаңымен, кеңес беру бөлмесімен және волонтерлік ұйым­дардың қызметімен таныс­тырды.

– Қалада «Волонтер жылы» жарияланбай тұрып, 5 жылға жуық осы бағыттағы жоба­ларды жүзеге асырып келе жат­қан ұйымдар бар. Олар қайы­рымдылық шараларынан қалыс қалмай, маңызды істердің басы-қасынан табылып келеді. Соның ішінде тоқыма киімдер тоқитын «28 ілмек» еріктілер клубын ерекше атауға болады, – деді орталық директоры.

Иә, «28 ілмек» еріктілер клубы қызылордалықтарға бұрыннан таныс. Клуб жетекшісі  Айгерім Нұрлан осыдан біраз уақыт бұрын шала туған балаларға  киімдер тоқуды қолға алып, қазір осы істі ұршықша иіріп отыр.

– Қатарымызда еріктілер. То­қыма білмейтіндерге клуб мү­­шелері үйретеді. Барлығы тегін. Мерзімінен ерте туған нәрес­телерге арнап  тоқимыз. Қазір қалалық перзентxана мен облыс­тық ана мен бала орталы­ғы­нан сұраныс жоғары. Жалпы, мұндай көмек  көрсететін еріктілер ұйымы еліміздің 13 қаласында бар, – деді Айгерім.

Бұл ретте қала әкімі де ел игілігі жолында жаңа жобаларды жүзеге асырудан жалықпауға шақырды. Биыл қала жастары үшін  жаңалық көп екендігін, түрлі бағыттағы 12 әлеуметтік жоба жүзеге асырылатынын жеткізді. Кездесу соңында орталық директоры Сабыржан Кеңшілік қала әкіміне еріктілердің атынан «Қызылорда қаласы – волонтерларының жанашыры» статуэткасын табыстады.

Мөлдір ҚАЛЫМБЕТ,

«Сыр бойы».