Сыр бойы

Қорқыт ата атындағы Қызылорда мемлекеттік университеті – талай талантты шґкірттерді түлетіп ұшырған  іргелі оқу орны. Осы жерден білім алған түлектердің бірқатары шет елдерде, еліміздің ґр түкпірінде белді маман болып қалыптасып, беделді қызметтер атқарып жүр. Бүгінгі заман талабына сай бґсекеге қабілетті мамандар даярлауда оқу орнының педагогикалық ұжымы тың ізденістермен, терең шығармашылықпен еңбек етіп келеді. Соның бір көрінісі – университеттің І оқу ғимаратында, шоқайтану ғылыми-зерттеу орталығында “Сыр медиа” ЖШС мен облыстық “Qyzylorda”  телеарнасында қазақ тілі мен ґдебиеті жґне журналистика кафедрасының филиалдарын ашу мақсатында кездесу өтті.

Шараға республикалық "Егемен Қазақстан", "Ай­қын" газеттерінің, "QAZAQ­STAN", "Хабар", "24 kz" теле­арналарының және ай­мақ­­­тағы "Сыр бойы", "Кы­зыл­ординсие вести" газет­тері­нің журналистері қатысты.

Жиында университет рек­торы Бейбіткүл Кәрімова оқу орнында атқарылып жат­қан жұмыстар барысынан хабардар етті. Онда "Пе­дагог мәртебесі" туралы заңға сәйкес университет про­фес­сор-оқы­тушыларының ­ай­лық жал­ақысы 30 про­цент­ке өскеніне тоқталды. Осы орай­да бәсекеге қабі­летті, білікті мамандар дайын­даудың жауапкершілігі де арта түскеніне тоқталды. Ректор бұл бағытта оқу орнының түлектерін жұмыс берушілердің талабы мен сұранысына сай білікті маман етіп даярлау мәселесі 2020-2021 оқу жылына арналған білім беру бағдарламаларында толық қамтылатындығын атап өтті. Бұл ретте университет тарапынан кәсіби бағдар беру жұмыстарын 7-8 сыныптан бастап жүргізу бағытында  арнайы Жол картасы әзір­ленгенін де айтты. 

– Көп жағдайда мектеп тү­лектерінің болашақ маман­дығының бейінді пәнін таң­дауына 10-11-сынып­тарда ғана мән беріледі. Не­гі­зінде, мамандық – әрбір жастың өмірлік таңдауы бол­ғандықтан, мектеп оқу­шылары оны ерте бастан таңдап, бейімделуі керек. Сонда ғана ол өзі таңдаған мамандығының кәсіби иесі бола алады. Міне, осы жұ­мыстарды жүйелі, тұрақты жүргізу және оқу­шыларға көмек көрсету, пси­хологиялық қолдау біл­діру мақсатында нау­рыз айы­нан бастап университетте «Рекрутинг» орталығы ашыл­ды. Бұл орталықта аймақ оқушыларымен қатар, ұлты қазақ шетел азаматтарын да өзімізге оқуға шақыру мақсатында белсенді жұ­мыс­тар атқарылып жатыр, – деді ректор.

Кездесуде сөз алған мем­лекет және қоғам қайраткері, облыстық телевизияның қа­лып­тасуында айқын қол­таң­басы бар Әбдіжәлел Бәкір Сыр өңірінің дәстүрлі жур­на­листикада өзіндік сара жолы қалыптасқанын атап өтіп, ақпарат таратудың жаңа медиа кеңістігінде де Сыр журналистикасының әлеуеті мықты екеніне сенім білдірді.

Университет профессоры Бағдат Кәрібозұлы оқу орнынан даярланып шыққан сала мамандарының елімізден асып, алыс-жақын шетелдерде абыройлы қызмет атқа­рып жүр­генін айтты. Ал ­"Qyzylorda"  телеарнасының ди­ректоры Жағыппар Қара­бала:

– Бүгінгі таңда облыстық телеарнада 100-ден астам шығармашылық мамандары болса, олардың әрбір үшіншісі – осы университеттің түлегі. Демек, бұл – журналистика саласы бойынша бәсекеге қабілетті, білікті мамандар даярлауда университет оқы­ту­шыларының табысты еңбе­гінің көрінісі, – деді. Әріп­тестік аясында атқарылатын шаралар жөнінде универ­­си­теттің журналистика кафед­расының меңгерушісі Ғабит Тұяқбаев және облыстық "Кызылординские вести" га­зетінің бас редакторы Қа­зыбек Ботаев пікір білдіріп, оқу орнында қолға алынып отырған жаңа бастамаларға қолдау танытып, өз ұсы­ныс­тарын ортаға салды.

Жиынның басты мақ­сатына сәйкес "Сыр медиа" ЖШС мен облыстық "Qyzyl­orda"  телеарнасында уни­вер­ситеттің қазақ тілі мен әдебиеті және журналистика кафедрасының филиалдарын ашу мақсатындағы әріптестік меморандумға қол қойылды.

Шарада еліміздің жур­на­листика саласында абы­ройлы қызмет атқарып жүрген "Айқын" газетінің облыстағы меншікті тілшісі Миуа Байназар, "Qyzylorda" телеарнасының директоры Жағыппар Қарабала Қорқыт ата атындағы "Алтын меда­ль­мен", облыстық "Сыр бойы" газетінің бас редакторы Қуат Шарабидинов, "Хабар" телеарнасының облыстағы тілшісі Нұрлан Жақыпбеков "Үздік түлек" медалімен марапатталды. Ал, "Сыр медиа" ЖШС бас директоры Аманжол Оңғарбаев, "Қоғам ТВ" телеарнасының басшысы Тұрсынкүл Желдербаева, "Егемен Қазақстан" газетінің меншікті тілшісі Мұрат Жетпісбаев, "Кызылординс­кие вести" газетінің бас ре­дак­торы Қазыбек Ботаев, "Хабар" телеарнасының тіл­шісі Қамбар Бекенов, "Qazaqstan" телеарнасының меншікті тіл­шісі Әділбек Жақанов ҚМУ-дің "Құрмет грамотасын" иеленді.

Ғазиза ӘБІЛДА,

«Сыр бойы».