Сыр бойы

Ақтаулық Арайлым есімді бойжеткен жұмыс іздеп, АҚШ-қа осыдан сегіз жыл бұрын сапарға атта­ныпты. Осылайша Work and Travel бағдарламасы бо­йынша Панама-Сити қала­сына келеді. Алғашқы кезде бірнеше жұмысты қатар атқарып жүреді.

– Мен дүкенде сатушы, қонақ үйде тазалықшы, аспаздың көмекшісі болып жұмыс істедім. Екі ауысымда жұмыс істеуге тура келді. Америкада негізгі жұмыс уақыты 8 сағатқа созылады, одан артық жұмыс істесең, қосымша ақы аласың. Демек, былайғы уақытта сағатына 7 доллар жалақы төлейтін болса, қосымша уақыт болған кезде 10,5 доллардан болып шығады. Әйтсе де, көптеген жұмыс берушілер артық ақша төлегісі келмегендіктен, аптасына 40 сағаттан артық жұмыс істетпеу жағын ойластырады, – дейді  Арай­лым baigenews.kz. сайтына берген сұхбатында.

Десе де, тұрғын бөл­ме, көлікті жалға алу, сақтан­дыру және тағы басқа шы­ғын­дарды төлеп тұру үшін Арайлымның бір тәуліктегі жұмыс уақыты 16 сағатқа дейін созылатын. Жұ­мысқа барып қайту уақытын алып тастағанда ұйықтауға бес сағаттан қана уақыт қалып жүрді. Қонақ үйде тазалықшы болып жүргенде демалыс күндерін беріп тұрады. Сол кезде дүкенде сатушылықты атқарып жүр­ген. Сондықтан демалыс деген арман іспеттес болды дейді Арайлым.

Алғашқы кезде Арайлым маман­дық квалификациясын сұра­майтын жұ­мыстар істеп жүрген. Уақыт өте келе бір өзгеріс қажет екенін сезінеді. Содан арнайы курста оқып, жоғары ақы төлейтін жұмысқа тұру туралы шешім қабылдайды.

– Күні бойы тік тұрып істейтін жұмыс ұнамады. Сол кезде алысқа қатынайтын жүк көлігінің жүргізушісі вакансиясы туралы естіп білдім. Көп ойланбастан жүр­гізушілер мектебіне тө­лейтін 2 мың доллар ақша жинауға кірістім. Курсты оқып бітіріп, барлық емти­хан­дарын тапсырып, көптен күткен лицензияға қол жет­кіздім, –  дейді ол.

Алайда, алысқа қаты­най­тын жүр­гізуші жұмысы оңай болмай шықты. Қарын­дасымыздың сөзінше әуелде 40 тонналық жүк көлігін жүр­гізуге қатты жүрексінеді. Десе де, ол бұл жұмысты атқара алды.

"Негізінде ешкім көмек­тесіп, ақыл қоспайды. Бәрін өзің тауып, өзің білуің керек. Мәселен, лицензия ал­ғаннан кейін тәжірибелі жүргізушімен бірге болып, жұмысқа бейім­делу кезе­ңі­нен өтуге тиіс болдым. Мен ондай адамды қазақ­стан­дықтар қатарынан іздестірдім. Отандастарым кө­­мек­теседі деген ойда бол­дым. Керісінше көптеген отан­дастарым ұсынысымды қабылдамады. Олар "бұл қыз­дардың жұмысы емес", "үйде отырсайшы" дегендей сөздер айтты. Бұл сөздерге ренжідім әрине. Дегенмен, осы сөздер өзімді қамшылап, менің қо­лым­нан келеді деген сенімім күшейе түсті" дейді Арайлым.

Оның айтуынша Сол­түстік Аме­рикада алысқа қаты­найтын жүк көліктерін жүр­гізетін қыз-келін­шектер аз емес. Оларды trucker lady деп атайды. Арайлым осындай 50 шақты қыз­­дың басын бірік­тірген чат ашқанын айтады.

"Жыл өткен сайын чатқа кіру­шілер көбейіп келеді. Америкада бұл маман­дық­ты жақсы көретін нәзікжан­дылар көп, өйткені та­бысы жаман емес" деді сөз соңында.