Сыр бойы

Қызылорданың «Қайсар» командасы құрамына Мозамбик құрамасының ойыншысы Файфе Режиналдо қосылды, - деп хабарлайды ҚазАқпарат тілшісі.

Режиналдо 1990 жылдың 14 маусымында Мозамбиктің Келимане қаласында дүниеге келген. Үлкен футболдағы алғашқы қадамын 2013 жылы Португалияның «Насьонал» (Фуншал) командасында бастаған ол содан бері сол елдің «Санта-Клара», Албанияның «Люфтетари», «Лачи», «Кукеси» командаларында ойын көрсетті. Былтыр ол Қарағандының «Шахтері» құрамына жазда қосылып, 13 ойында 3 гол соқты. 

Файфе Режиналдо 2011 жылдан бері Мозамбик құрамасы сапында ойнайды. Қазірге дейін 25 кездесуде қарсыластар қақпасын 3 мәрте дәл көздеді.

 Бұдан бұрын «Қайсар» басшылығы қорғаушылар - Елдос Ахметов және Бағдат Қайыров, грузиялық шабуылшы Элгуджа Лобжанидзе, кабо-верделік жартылай қорғаушы Алвин Фортес, украиналық қорғаушы Ризван Аблитаровпен келісімшартқа отырған болатын.