Сыр бойы

«Мұз айдыны» спорттық-сауықтыру кешенінде «Nur Otan» партиясының 20 жылдығына орай, Жастар жылы аясында алғаш рет облыстық «Jas Otan» Жастар қанатының кубогіне стритбол ойындарынан облыстық турнир өтті. Спорттық шара «Nur Otan» партиясы Қызылорда облыстық филиалының қолдауымен ұйымдастырылды.

 Бүгінге дейін 7 аудан және Қызылорда, Байқоңыр қалаларында өткен іріктеу ойындарында 64 команда арасында үздік шыққан 12 топ облыстық турнирде бақ сынады.

Халық арасында көше баскетболы аталып кеткен ойынды 300-ге жуық көрермен тамашалады. Шараны тамашалуға келген облыстық партия филиалы төрағасының бірінші орынбасары Ақмарал Әлназарова «NurOtan» партиясы салауатты өмір салтын қалыптастыруға, тұрғындар арасында бұқаралық спортты дамытуға және спортпен шұғылданамын деген жастарға қашанда қолдау көрсетуге дайын екенін жеткізді.

Атап өту керек, «NurOtan» партиясы облыстық филиалы спорттың осы түрімен шұғылданамын деген жастар үшін орталық алаң маңында арнайы стритбол алаңын жасақтауға қолдау көрсетіп отыр. Бүгінгі күні қаржысы шешілген. Алдағы уақытта құрылыс жұмыстары жүргізіліп, спортшы жастар еш кедергісіз шынығатын болады.

Жалпы стритбол ойыны 90 жылдардың аяғында пайда болған. Қазір оның дамығаны сонша алдағы олимпиада бағдарламасына қосылды. Ал оның дәстүрлі баскетболдан айырмашылығы ойыншылар саны мен ойын алаңының жартысын ғана пайдалануы.

Ойында әр кездесу талас-тартысқа толы болды. Дегенмен мықты ойын өрнегін көрсеткен командалар жинаған ұпай санына байланысты жүлделі орындарды еншіледі. Қызылорда қаласының EAST командасы облыстық «Jas Otan» Жастар қанатының кубогі мен 150 мың теңге қаржылай сыйлығын жеңіп алды. ІІ орын Қорқыт ата университетінің ҚМУ командасына, ІІІ орын Байқоңыр қаласынан келген спортшыларға бұйырды. Жеңімпаздар қаржылай сыйлықтармен марапатталды.