Сыр бойы

Жалағаш кентіндегі Абай көшесінің бойында ауыл шаруашылығы өнімдерінің жәрмеңкесі өтті. Жалағаш кентінен және ауылдық округтерден 70-ке жуық көлікпен 14 млн-ды құрайтын 54 тонна өнім әкелінді. Өнімдер нарықтық бағадан 10-15 пайызға арзандатылып сатылды.

Жәрмеңкеде сыр маржаны – күріштің 1 келісі 200-250 теңгеден, қабы 5000-6250 теңгеден, картоп – 70-80, жуа – 60, сәбіз -70 теңге, сиыр еті – 1600, жылқы еті – 1800 және тағы басқа өнімдер тұрғындарға қолжетімді бағада сатылды. Сазды әуенге бөленген алаңдағы қаз-қатар тігілген көліктер мен сөрелерден қажет азығын сатып алушылар лек-легімен келіп жатты.

Жәрмеңкеде болған аудан әкімі Қайратбек Сәрсенбаев бағаның қолжетімділігін көріп, тұтынушылар мен сатушыларға сәттілік тіледі. Аудан орталығындағы ауыл шаруашылығы өнімдерінің жәрмеңкесі көптің көңілінен шығып, жалағаштықтар өз алғыстарын білдірді.