Сыр бойы

Жуырда өткен облыстық ауыл әйелдер форумы ел ішінде кәсіпті дөңгелетіп жүрген нәзік жандардың есімін көпке танытты. Форумның негізгі мақсаты да осы, яғни, кәсібімен жетістікке жеткен ауылдардағы кәсіпкер әйелдердің жетістігін насихаттау. Форумға қатысқан кәсіпкер әйелдердің бірі – көпбалалы ана Ақтоты Абдуова.

Кішкентайларын балабақ­шаға апарғанда бүлдіршіндер үшін орын жеткіліксіздігін бай­қаған ол осы олқылықтың орнын толтыруға үлес қоссам деген ойды естен шығармады. Ойға алған іске алғашқы қадам жасап та көрді. Балабақша үшін ең алдымен ғимарат керек екені сөзсіз. Тәуекелге бел буып екінші деңгейлі банк­тер­ден несие алып, шаңы­ра­ғын балабақшаға бейімдеп жаб­дық­тады.

Тынымсыз ең­бек нә­тижесіз емес. Шағын үй тәуір балабақшаға айналды. Уақыт талабына сай етіп жабдық­тал­ған, 75 орындық «Бақ-Нұр­бө­бек» балабақшасы 2017 жылы пайдалануға берілді. Тұр­ғын­дардың қуанышында шек жоқ. Себебі, бұл – бүлдір­шін­дер үшін балабақша, жұмыс таппай жүр­гендер үшін жаңа жұмыс орны еді.

Уақыт өте келе кенттің кішкентай тұрғындары үшін әлі де балабақша жеткіліксіздігі сезіле бастады. Бұл кезде бі­раз тәжірибе жинаған Ақ­тоты екінші бақшаны ашуда аса қиналмады. «Аяла» 50 орындық балабақшасы да кішкен­тай­лар­ға толды. Кәсіпкердің енді­­гі ойы – сапалы тәрбие беру. Кіш­кентайларын сеніп тап­­сыр­ған ата-аналар өзіне жауап­­кер­шілік жүгін артқанын се­зін­ген Ақтоты Абдуова қос балабақшаның уақыт талабына сай, жоғары деңгейде қызмет көрсетуі үшін еңбек етті.

Бұл орайда халық тұрмысы­мен санасқан кәсіпкер тұрмысы төмен отбасы бүлдіршіндерінің балабақшадан тыс қалмауын на­зарда ұстады. Бүгінде екі ба­лабақшада 30 тұрмысы төмен отбасы балалары ақысыз тәр­биеленуде. Биыл мұнда мектепке дейінгі даярлық тобы ашылған. Бұл да – уақыт сұра­нысы. Уақыт көшіне ілесе білуді мақсат еткен Ақтоты  кә­сіпкерлер палатасы аудан­дық филиалының көмегіне жү­гініп, жақында Түркиядан аға сеньорлар шақыртты. Олар балабақша мамандарына кіш­кентайларға ағылшын тілін үй­рету бойынша өз тәжіри­белерімен бөлісті.

Көпбалалы кәсіпкер қоғам­дық жұмысқа белсене араласады. 2015 жылдан «Болашаққа қадам» қоғамдық бірлестігінің негізін қалап, ардагерлер мен мүмкіндігі шектеулі жандарға қамқорлық жасап келеді. Аудан­дық іскер әйелдер ассо­циа­циясының төрайымы ре­тін­де кәсіпкерлікке бейімі бар нәзік жандарға бағыт-бағ­дар беруде белсенді жұмыс жүргізуде.

– Әйелдер форумы отбасы, бала тәрбиесімен қатар кәсіп­ті дөңгелетіп жүрген іскер әйелдер еңбегін насихаттауға бағытталды. Бұл шарада жо­лын­дағы кедергілерге қара­мастан тәуекел етіп, іс бастаған еңбекқор нәзік жандардың өмір жолы, еңбегі тәнті етті, – дейді ол.

Форумда Ақтоты Абдуова облыс әкімінің марапатына ие болды.