Сыр бойы

 Жуырда техникалық реттеу, метрология және менедж­мент жүйелері саласындағы жұмысшылардың біліктілігін арттыру бойынша семинар өтті.

Семинарды Қазақстан стандарттау және сертификаттау институты ұйымдастырды. Жиынға 90-ға жуық маман қатысып, олар үш күн ішінде Еуразиялық экономикалық одақтың техникалық реттеудің құқықтық негіздерімен, ҚР сәйкестікті растау, менеджмент жүйелерін сертификаттау саласындағы жаңа тәсілдермен танысты. Сондай-ақ, метрология саласындағы заңна­мадағы жаңалықтар мен ЕАЭО техникалық регламенттерін қолдану ерекшеліктері туралы нақты ақпараттар алды. Дәрісті саланың басым секторларының мамандары және техникалық реттеу жүйесінің сарапшы-аудиторлары жүргізді. Олардың қатарында “ҚазИнСт” РМК Павлодар филиалының бас маманы Рымкеш Исина, ҚР ЭМ тәуелсіз сарапшы-кеңесшісі Қазкен Оразалина, хи­миялық физика және технология институтының зертхана меңгерушісі Гүлжан Жаңабаева бар.

– Бұл семинар “ҚР индустриалды-инновациялық даму” бағдарламасы мен техникалық реттеу және метрология жүйесін 2020 жылға дейін жетілдірудің  кешенді жоспары аясында өткізілуде. Негізгі мақсат – өнеркәсіп, бизнес саласында жұмыс істейтін қызметкерлердің халықаралық стандарттарға сай тауар өндіруіне, қызмет көрсетуіне бағыт-бағдар беру. Дәріске қатысушылар өздерінің кәсіби деңгейін жақсартып қана қоймай, болашақта іс жүзінде өнім мен қызмет өндірісін жетілдіруде нәтижеге қол жеткізу мүмкіндігіне ие болады, – деді техникалық реттеу және метрология комитеті облыс бойынша департаментінің бөлім басшысы Әуелбек Қамзаев.

Мейрамгүл ДАУЫЛБАЙҚЫЗЫ.