Сыр бойы

Өскен өңірі, ұлан-ғай­ыр ұлысы, жалпақ жұр­ты­ның даң­қын көкке кө­терген саңлақ перзенттер бар. Атағы шарта­рап­қа та­нылған Арал аймағы­ның да беделін биіктетіп, шоқ­тығын асырған сайып­қы­ран ұл­дары аз емес. Сол тізімнің ба­сында қа­рымды қаламгер, атақты жа­зушы Әбдіжәміл Кә­рімұлы Нұр­пейісов тұр.

Халқымыздың «қос тойың  қабат болсын» де­­ген сөзі бар. Шұрай­лы шығармалары, тұ­шым­ды туындылары рес­пуб­лика көлемінен асып, әлемнің көптеген мем­ле­­кеттерін мекендеген алуан ұлттың тіліне аударылып, ну ормандай қалың  оқырмандары іздеп жүріп оқитын Әбдіжәміл Кәрімұлы жуырда тоқсан бес жастың төріне шықты. Оған қоса ҚР Президенті Қасым-Жомарт ­То­қаевтың Жарлығымен ұлттық әде­биетті дамытудағы айрық­ша еңбегі үшін жазушыға жоғары дәрежелі ерек­ше­лік белгісі – «Қа­зақ­стан­ның Еңбек Ері» атағы берілді.

Осынау ақжолтай ха­бар Әбекең дүниеге ке­ліп, кіндігін кескен, ат жалын тартып мінген ме­кені қа­сиетті Арал ай­мағын дүр сілкіндірді. Әлем ха­лық­тары жазушыла­рының шы­ғармалары ішінде орны бөлек «Қан мен тер» туындысына арқау болған теңіз төскейінің жұрты жерлестерінің толағай табысына алғаусыз қуануда. Мұндайды қазекең «ақ түйенің қарны жарылды» деп  атайды.

Құрметті Әбе аға!

Бүгінгідей шаттыққа толы сәтіңізде атажұр­тыңыз өзіңізге  ақжарма тілегін жолдайды. Сіз­дің ғибратты ғұмырыңыз – өскелең ұрпаққа адас­тырмас шамшырақтай  үл­гі-өнеге. Жер­лес­теріңіз  сіз­дің есіміңізді мақ­таныш тұтады. Аман болыңыз, Аралдың асыл абызы!

Ізгі ниетпен, 

Арал ауданы ардагерлер қауымы.