Сыр бойы

КСРО Халық жазушысы, әлем әдебиетінің мэтрі Әбдіжәміл Кәрімұлы  Нұрпейісовтің 95 жасқа толуына орай жазушының Аралдағы Әдебиет үйінде «Әдебиетіміздің мақтанышына айналған алыбымыз» атты тағылымды кеш өтті. Кештің мақсаты – жастарға жазушының  болмыс-бітімі мен туған жерге деген парызын өтеу жолындағы еңбегін, көркем сөздің қадірін ұғындыру.

«Соңғы парыз» романының желі­сіне құрылған көріністен бастау алған тағы­лымды  кешті аудан әкімінің орынбасары Рүстем Өтешов ашып берді.   Қазақстан Журналистер одағының мүшесі, дербес зейнеткер Шәкірат Дәр­мағамбетов пен мемлекет және қоғам қайраткері Құдайберген Саржанов жазушының өмір жолынан сыр шертіп, адами қасиеттеріне тоқталды. Жас ұрпақты қазақ жұртының игі­лігіне айналған, тағылымға толы шы­ғар­маларды өнеге тұтып, қазақ сөзінің киесін қадірлеуге шақырды. Кеш соңында Айнұр Сүйеуова Ахмет Өмірзақтың «Мұхитқа қол соқтырған қазақ сөзі» атты жазушыға арнауын шырқады.

Арал қалалық тарихи музейінің ұйым­дастыруымен өткен шара аудан­дық мәде­ниет үйінде жалғасын тапты. Көрермен көзайымына айналып, кө­ңілдерге сағыныш ұялатқан ­Ә.Нұрпейі­сов­тің романы желісімен түсірілген «Қан мен тер» фильмінің көрсетілімі болды. 1978 жылы Әзірбайжан Мәм­бетов пен Юрий Мастюгин түсірген фильм Халық шаруашылығы жетістік­тері көрмесінің Алтын медалін және Ашхабад қаласындағы кинофестивальда «Ең үздік тарихи-революциялық фильм» номинациясы бойынша бірін­ші жүлде алған. «Қан мен терді» оқыған оқырман романның ішіне еніп кеткені сондай, Еламан, Тәңірберген, Кәлендерді тіріліп келсе, қастерлеп қақ төрінен орын берердей әсерде қалып, тебі­ренеді. Кемел ойдың алып кемесіне айналған, дархан да дана, Аралды күллі әлемге мәшһүр еткен, Алатаудай атамызбен қалай мақтансақ та жарасады.

Ботагөз САРБАСОВА,

Арал қалалық тарихи музейінің 

филиал меңгерушісі.