Сыр бойы

 Бір-екі күнде жылу беру маусымы басталады. Осы орайда қысқа дайындықты бір пысықтаған жөн болар. Қыс отынын қамдап, пеш тазаладыңыз ба? Мұржалар талапқа сай ма? Кемтігі болса ертерек жөндеу керек. Қыс дайындығына сақтық керек екенін ескерткен Төтенше жағдай департаментінің қызметкерлері бүгінде әр үйдің есігін қағып жүр. Облыста «Өрт қауіпсіздігі» айлығы жүруде.

Өңірлік коммуникация қыз­ме­тінде өткен брифингте Тө­тенше жағдайлар депар­та­менті бастығының міндетін атқарушы Руслан Қайрақбаев, де­пар­та­менттің зілзалалар қауіп-қа­терін азайту және азаматтық қорғау саласындағы бақылау басқармасының басшысы Бақтияр Тұрманов жылу маусымында сақтық шараларына мұқият болу қажеттігін айтты.

Тілсіз жаудың алдын алу үшін ұқыптылық пен қауіпсіздік ережелеріне мұқият болу қажет. Өткен жылу беру маусымы кезінде немқұрайлылық соңы қайғылы жағдаймен аяқталды. Облыс бо­йынша тұрғын үйлерде 147 өрт оқиғасы орын алған. Өрттен 7 адам қаза болып, 5 адам жарақат алған. Түтінге улану фактісі бойынша – 11, табиғи газға улану фактісі бойынша 2 жағдай тіркелген.

– Тұрғындардың өрт қауіп­­сіздік шараларына сал­ғырт қарауынан, тұрмыстық пеш­тердің техникалық жағ­дайына мән бермеуінен, балаларды қараусыз қалдырудан өрт болып жатады, – дейді Р.Қайрақбаев.

Мамандардың айтуынша, жылу беру маусымында пештің түтін шығу жолдары екі-үш реттен тазалану қажет. Алайда, тұрғындар мұны ескере бермейді. Департамент жариялаған «Өрт қауіпсіздігі» айлығы кезінде қызметкерлер мен еріктілер әр үйге барып, сақтық шараларын түсіндіруде.

Биыл облыс әкімдігінің қол­дауымен көмірқышқыл газы­ның да­былқаққышына тапсырыс берілген. Қондырғы әлеу­­меттік жағдайы төмен, көп­бала­лы отбасылардың үйлеріне орнатылмақ. Мұндай санаттағы 1528 тұрғын үй анықталған.

Гүлмира ДІЛДӘБЕКОВА.