Сыр бойы

Қайырымдылық қанаттанған қоғамда мейірімділік орнайды. Көмекке мұқтажға жылылық таныту – елдің ортақ мүддесі. Бұл бағытта қолға алынып отырған шаралар аз емес. Соның бірі – «Қайырымдылық керуені» рес­пуб­ликалық конкурсы. Оның мақсат-міндетін облыс бойынша «Іскер әйелдер қауымдастығы» қоғамдық бірлестігінің төрайымы Манат Алмашева мен бірлестік мүшесі Рахима Ахметова, «Жас қанаттар» бірлестігінің төрайымы Ақгүл Абдрасул өңірлік коммуникациялар қызметінде өткен баспасөз конференциясында тарқатып айтты.

– Қоғам деген құндылыққа селт етіп, сезім білдірмейтін бәзбір жандар барын жасыра алмаймыз. Десе де, арамызда өзінен бұрын өзгені жоғары қойып, қиын сәтте қол ұшын беруге әзір адамдар бар. Конкурс осындай жандардың ісін  көпке үлгі етуді мақсат етеді.  Екінші жағынан, ол жас ұрпақтың бо­йында  ізгі қасиеттерді оятады деп білеміз. Республикалық конкурстың ірік­теу жұмысы 2 қыркүйектен 29 қа­рашаға дейін жалғасын таппақ. Жеңім­паздар  есімі  ақпан  айының соңында белгілі  болады,  –  деді  Манат Тамабайқызы.

Сондай-ақ, спикер лауреаттар «Асар», «Туған жер», «Мейірім жолында», «Батыл жүрек», «Қайы­рым­дылық тарихы» секілді номина­циялар бойынша анықталатынын айт^­ты. Байқауға кәсіп­керлік субъектілері мен қайы­рым­дылық қызметті мемлекеттік қол­дау арқылы жүргізетін тұлғалар қатыстырылмайды.

М.СНАДИНҚЫЗЫ.