Сыр бойы

Облыстық жұмыспен қамтуды үйлестіру және әлеуметтік бағдарламалар басқармасына қарасты №1 ­Қызылорда арнаулы әлеуметтік қызметтер көрсету орталығында ­Халықаралық қарттар күніне арналған шара өтті. 

Алдымен қонақтар орталықтың тыныс-тіршілігімен танысып, қызмет алушылардың қолөнер бұйымдары көрмесін тамашалады.

Мерекелік шараға облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Айгүл Ибраева, «Nur Otan» партиясы облыстық филиалының бөлім басшысы Алтынбек Жарылқасынов, «Абзал және компания» толық серіктестігінің директоры Мағжан Ералиев, «Жас Отан» жастар қанатының төрағасы Талғат Тілес қатысып, ардагерлерді құттықтады.

– Тәжірибесі мол аға буынның өмір жолы біз үшін аса құнды. Сондықтан xалқымыз ертеден-ақ үлкенге құрмет көрсетуді өсиет етіп, ұрпақтар арасындағы сабақтастыққа, үй­­лесімге ерекше мән берген. Қа­зыналы қарттарымыздың қа­тары ортаймасын. Көрер қызықтарыңыз көп болғай. Сіздерге зор денсаулық, ұзақ өмір, әулеттеріңізге бақ пен береке тілеймін, – деді ­А.Ибраева.

Орталықта ұйымдастырыл­ған «Алтын күз» жәрмеңкесінде түрлі ұлт өкілдерінің тағамдары таныстырылып, келген қонақтарға ыстық бауырсақ таратылды.

Айта кету керек, орталықта күтімге және медициналық көмекке мұқтаж зейнеткерлер мен І, ІІ топ мүгедектері тұрады. Қазіргі уақытта стационарлық жағдайда 153 қызмет алушы, оның ішінде 59 мүгедек және  жасына байланысты 94 зейнеткер, сондай-ақ күндізгі бөлімшеде 100 қызмет алушы бар.

Шынар БЕКБАН.