Сыр бойы

– Саяси құжатта көр­се­тілген мақсат-мін­деттер түйінді мәсе­ле­лердің шешілуіне ықпал етіп, тұрақтылық пен табысқа бастайды. Оны әлеуметтік өзгерістердің кешенді бағдарламасы десек болады, – деді Н.Байқадамов.

Сонымен қатар Наурызбай Сейітқалиұлы об­лыста идеологиялық бағытта қолға алынған шара­ларға тоқталып, білім беру саласындағы басым міндеттерді, ден­саулық сақтау саласын­дағы оң бастамалар мен спорттағы байыпты істерді ортаға салды. Спикердің айтуын­ша, биыл білім беру сапасын арттыру мақ­сатында бірқатар шара жүзеге асқан. Соның нәтижесінде Сыр жастары халықаралық, рес­публикалық білім додаларында топ жарып жүр. ҰБТ нәтижесі де жоғары. Түлектердің 60 процент­тен астамы жоғары оқу орындарының мем­ле­кет­тік грантына қол жет­кізген. Сонымен бірге биылғы оқу жылында облыстың еңбек ресурстары балансына сәйкес, колледждерде «Жаңа мамандықтар атласын» зерделей отырып, өңірге қажетті мамандықтарды ашу және түлектерді тұрақты жұмысқа орналастыру бойынша рейтинг жүргізу қолға алынады.

– Жасанды интеллект санадан асып тү­сіп, робототехника жаңа қарқынмен дамып келеді. Сондықтан креативті ой­лайтын және серпінді инновацияны жасауға қабі­летті маман­дарды әзірлеу керек. Ол үшін алда пайда болатын немесе тұрақты сұранысқа ие болып қала беретін мамандықтарды айқындауға ықпал ететін құралға, яғни атласқа сүйенгеніміз жөн. Үздіксіз білім алуды да тоқтатпау қажет. Әлемдік тәжірибеге көз жүгіртсек, кей елдерде табиғи ресурс аз болғанымен, билік адами капиталды дамытуды жолға қойған және өмір бойы білім алу тұжырымдамасын негізге алған. Болашақтың нақты инвестициясы да осы,  – деді облыс әкімінің орынбасары.

Облыс әкімінің орын­басары денсаулық сақтау саласындағы цифрландыру тұрғындарды әуре-сарсаңнан құт­қа­рып, ашықтық пен жария­лылықты қамта­ма­сыз етуге мүмкіндік бергенін жеткізді. Дәрігер тап­шылығы мәселесін шешу бағытындағы ілкімді істерді алға тартты. Соң­ғы үш жылда 400-ге жуық жас маман өңірдегі медициналық ұйымдарға жұмысқа тартылғанын, қазір оның тең жартысы бас­тапқы медициналық сани­­тарлық көмек көр­сету ұйымдарында қыз­мет ететінін айтты.

Жастарды бұқаралық спортқа жұ­мылдыруға бағыт­талған жоба­лардың қар­қын алуы да қуантады. Қазір облыста заманауи спорт алаңдары, стадиондар, сауықтыру алаңдары көптеп салынуда. Мәсе­лен, биыл билік пен жеке сектор арасындағы тиімді байланыстың, яғни МЖӘ-нің аясында 20 жоба жүзеге аспақ. «Облыстың әлеуметтік-экономикалық дамуы­­ның 2019-2022 жылдарға арналған кешенді жоспары» негізінде 7 спорттық нысан құрылысын іске асыру көзделген. Оның ішінде байдарка және каноэ есу базасының, сол жағалауда орналасатын көгалдағы хоккей алаңы құрылысы мен Тасбөгет, Жосалы, Жалағаш, Шиелі кенттері мен Ақай ауылынан салынатын 5 дене шынықтыру-сауықтыру кешенінің құрылысы бар.

Бұдан бөлек, облыс әкімінің орынбасары 2020 жылы атаулы күндерге орай басымдық берілетін шараларды қаперге салды.

– Әл-Фарабидің 1150 жылдық, Абай Құнан­байұлының 175 жыл­дық және Алтын Орда мемлекетінің 750 жыл­дық мерейтойын, сон­дай-ақ, ең ұлы мереке – Ел Тәуелсіздігінің 30 жылдығын атап өтеміз. Бүгінде кешенді шаралар жоспары әзірленуде, –деді Наурызбай Байқадамов.

Брифингті қоры­тын­­ды­лаған Наурыз­бай Сейіт­қалиұлы аймақ дамуын ілгерілететін жұ­мыс­тардың одан әрі жалғасатынын, жаңа мін­дет­терді іске асыруға, жаңа­шылдықтар енгізуге күш салынатынын атап өтті.