Сыр бойы

Қазалы ауданының әкімі Мұрат Ергешбаев Әйтеке би кенттік клубында ашық есік күнін өткізіп, жас кәсіпкерлермен кездесті.

Басқосуда алдымен аудандық кәсіпкерлік бөлімінің басшысы Ақтілеу Бөріқұлақов, кәсіпкерлік палатасының директоры Ермек Аймаханов, «Ауылшаруашылығы қаржылай қолдау» қоры акционерлік қоғамының Қазалы ауданындағы өкілі Қанат Сүйеубаев хабарлама жасап, өз салалары бойынша жан-жақты бағыт-бағдар берді.

Мұнан соң кездесуге келген тұрғындар аудан әкіміне сұрақтарын қойып, жауаптарын алды.  

Өз кезегінде аудан әкімі Мұрат Ергешбаев жастарға ерінбей еңбек етіп, қолыңнан келетін кәсіппен айналысуға кеңес берді.

– Бүгінгі таңда біздің елімізде кәсіпкерлікпен айналысам деушілерге барлық жағдай жасалған деп ойлаймын. Әрине, қолынан жұмыс келетін адам талап қылып, бірден іске кірісіп кетеді. Бұл ретте мен әрдайым Ғани Мұратбаев ауылындағы жас кәсіпкер Сұлтанды көпке үлгі етіп айтып жүремін. Ол алғашында жеңілдетілген несие арқылы 2 жылқы алды. Бүгінгі күні ол мал санын төртеуге жеткізіп, қымызын сатып отыр. Қарап отырсаң жап-жас бала осының бәрін игеріп отырған. Мұндай мысалдар көптеп кездеседі. Мысалы Абай ауылында он саусағы жоқ ісмер азамат бар. Ол ештеңе қарамастан тігінмен айналысып, қайтарымсыз грантқа да қол жеткізді. Еңбектенген адамға жұмыс істеуге болады ма? Әрине болады. Ал, «жоқ, жоқ» дей берсең ештеңе де болмайды, – деді Мұрат Нәлхожаұлы.

Шара соңында аудан басшысы «Жас кәсіпкер» жобасы бойынша оқыған жастарға сертификаттарын табыстады.