Сыр бойы

Қазалы ауданына қарасты Ақтан батыр ауылын абаттандыру жұмыстары қарқынды жүріп жатыр. Өткен жылы облыстық бюджеттен бөлінген қаржыға орталық алаң мен саябақ пайдалануға берілді.

Қазіргі таңда арбат бойындағы түнгі жарықшамдар самаладай жарқырап тұр. Саябақ ішінде орындықтар, кіші архитектуралық формалар, темір күрке, балалар ойын және спорт алаңқайлар орналасқан. Мұнда ауыл балалары асыр салып ойнап, бос уақыттарын тиімді өткізуде. Ал, концерттік бағдарламалар өтетін ашық сахна алаңында ауыл тұрғындары мен қонақтары талантты өнерпаздардың өнерін тамашалап жүр.

Елді мекенді абаттандыру жұмыстары биыл да жалғасын тауып, Ақтан батыр ауылынан 150 орындық стадион салынуда. Стадион құрылысын «Сыр маржаны» ЖШС жүргізуде. Бүгінгі таңда серіктестік жұмысшылары белгіленген жерді тегістеу, топырақ үю сияқты жұмыстарды аяқтады.

Стадион салынып жатыр деген жаңалықты естіген ауыл тұрғындарының қуанышында шек жоқ. Себебі енді ауыл балалары топырақты шаңдатып емес, жасыл алаңда доп тебеді. Жасанды футбол алаңында жыл он екі ай ала доптың қыр-сырын меңгеруге болады. Сондай-ақ, стадионда жүгіру жолағы мен волейбол ойнайтын алаң да салынады.

Айта кетейік, Ақтан батырдағы Ақтан батырдағы бұл стадион облыс көлеміндегі елді мекенде салынған екінші стадион. Ауылдық жердегі алғашқы стадион бұған дейін Нағи Ілиясов ауылында пайдалануға берілген болатын.

Қазалы аудан әкімінің баспасөз қызметі