Сыр бойы

 Ауыл шаруашылығы дақылдарының басты жауы – шегіртке. Қыс бойы ұйқыда жатқан зиянкестерді ояна салысымен «шынжырламаса» егінге шығын әкелері анық.

Ал оның таралуын болдырмау үшін агротехникалық және фитосани­тариялық күрес іс-шаралары уақытылы жүргізілуі тиіс. Осыған байланысты өңірде фитосанитариялық іс-ша­раларды дер кезінде сапалы жүргізу үшін жұмыс тобы құрылып, қызу тірлік басталып кетті. Мәселенің мәнісі об­лыстық аумақтық инспекциясы мен мердігер мекемелердің қатысумен тех­никалардың дайындығы жөнінде семинар-кеңесте кеңінен талқыланды.

Сала мамандарының айтуынша, биыл италиялық прус зиянкестеріне қарсы  48 838 гектар жер өңделетін болса, ал ерекше қауіпті азиялық шегірт­ке жайлауы мүмкін аумақтың көлемі 72 633 гектар болып отыр. Бұл аумақ та химиялық өңдеуден өтеді. Өңдеу жұмыстарын 5 маусымнан 30 маусымға дейін жүргізу межеленуде. Облыстық аумақтық инспекция басшысы Еркебұлан Бекжановтың айтуынша, барлық өңделетін жер көлемі 121 471 гектар.

– Шегірткеге қарсы монито­ринг, фитосанитариялық іс-шара жұмыста­рын бірлесіп жүргізу мақсатында, көрші­лес Ақтөбе, Қарағанды және Түркістан облыстарымен ынтымақ­тастық келісім-шарт жасалды. Биылғы ауа райы­ның ылғалдылығы мен сал­қын болуына орай зиянкестер «ұйқы­­сынан» кеш оянуда. Олармен күрес әдеттегіден 10-12 күнге кеш басталу себебі де сондықтан.  Қазіргі уақыт­та «РФДжБӘО» РММ облыстық аудандық филиалы мамандары зиянды және ерекше қауіпті организмдердің дернәсілдеріне қарсы көктемгі-жазғы мониторинг жұмыстарын жүргізуде. Инспекция тарапынан оған бақылау жасалуда,– деді Е.Бекжанов.  

Семинар барысында аудан басшылары  атқарылған жұмыстар есебін беріп, өңірде қалыптасқан мәселелерді ортаға салды, ұсыныстарын білдірді. Зиянкестермен қарсы күресу үшін қажетті техникалар әр ауданға үлес­тірілді.