Сыр бойы

Сейсенбіде елімізде кең ауқымды денсаулық акциясы басталды.  «Медицина жанымызда!» ұранымен өткізілетін шара  6  мамырға дейін жалғасатын болады. 

Оның мақсаты – ауруханасы жоқ шалғай ауылдар мен елді мекен тұрғындарына медициналық көмектің қолжетімділігін арттыру, дәрігерлерден құралған бригадалар арқылы медициналық және консультативті көмек көр­сету, келер жылдан бастап қолданылатын міндетті әлеу­меттік медициналық сақ­тан­дыру жүйесі туралы кеңінен ақпарат беріп, жаңа жүйенің ерекшеліктері жөнінде түсін^­дірме жұмыстарын жүргізу.

Өңірімізде аталған акция Сыр­дария ауданындағы Қалжан ахун ауылынан бастау алды.  Бұл күні медициналық бригада құрамындағы жалпы тәжірибелік дәрігерлер, педиатр, терапевт, хирург, невропатолог, кардиолог, эндокринолог, стоматолог мамандар тұрғындарды қабылдады. Дәрігерлік тексеру барысында келушілердің қан қысымы өлшеніп, қандағы қант пен холес­терин мөлшері анықталды және флюорографиялық, электро­кар­диограммалық тексерулер жүр­гізіліп, ультрадыбыстық зерттеу­лер жасалды.

Бұл жерде фельдшерлік акушерлік пункт болғандықтан дәрігер жоқ, тек фельдшер жұмыс жасайды. Сондықтан мамандар кеңестер беріп, саламатты өмір салтын ұстануға шақыруда,–деген Сырдария аудандық ем­ханасының кардиолог дәрігері Гүлзат Тыныштықбаева шара басталғалы 1 сағат көлемінде 10-нан астам тұрғын қаралғанын, қан қысымы көтеріліп кел­гендеріне алғашқы көмек көр­сетілгенін де айтты. 

Акция аясында медициналық тексеруден өтуге арнайы келген ауыл тұрғыны Гүлжәмилә Досығұловамен тілдескен едік. Екі жылдан бері жүрек ауруынан есепте тұратын зейнеткер шараны ұйымдастырушыларға риза екенін жеткізді.

– Ауданнан дәрігерлер келеді дегенді естіп таңертең осы жерге ертерек келдім. Өзім екі жылдан бері жүрек ауруынан есепте тұрамын. Қан қысымым жиі көтеріліп кетеді. Жаңа да көтеріліп тұр екен. Дәрігерлер қарап, алғашқы көмек көрсетті, дұрыс тамақтану, ем-шаралар туралы кеңес берді. Кардиологтан басқа да мамандарға қаралдым.  Бұл дәрігері жоқ біздің ауыл тұрғындары үшін өте тиімді шара болды деп ойлаймын. Ұйымдастырушыларға үлкен рахмет,– деді ол.

Жалпы, Сырдария ауданына қарасты 14 ауылдық округте тұратын 36 мыңнан астам тұр­ғынға аудандық аурухана, емхана, 3 фельдшерлік акушерлік пункт, 1 медициналық пункт жә­не 9 дәрігерлік амбулатория қыз­мет көрсетеді, оларда 700-дей адам жұмыс жасайды, оның ішінде 85-і дәрігер.  Аудан облыс орталығына жақын болғанымен, 13 аудандық округтің алтауы Сыр­дария өзенінің арғы бетінде ор­наласқан. Бұл өз кезегінде тұр­­­ғындардың аудандық ем­ха­­­на­ға дер кезінде қаралуына ке­­дер­гі келтіреді. Сонымен бір­ге ауылдық амбулаторияларда жо­ға­ры білімді дәрігерлер же­тіс­пеу­­­шілігінің де бары жасырын емес.

– Өткен жылы ауруханада жаңадан 5 бөлімше ашылды. Олар қабылдау, оңалту, ме­йіргерлік күтім, гинеколо­гия бөлімдері және екінші дең­гейлі перзентхана. Ал емханада профилактикалық бөлім, мүм­кіндігі шектеулі жандарға ар­налған кабинет және CaII ор­талығы ашылды. Қазіргі таңда құрамында тар буынды маман­дар, психолог, әлеуметтік қызметкерлер бар мобильді топ құрылып, 14 елді мекенге шығып, көмек көрсетті. Медициналық көмектің қолжетімділігін арттыру бағытындағы жұмыстар бізде үздіксіз жүргізіліп келеді. Тек бұл акция аясында емес, біздің мобильді топтар сенбі күндері кесте бойынша ауылдарды аралап көмек көрсетеді және медициналық кепілді кө­мек бойынша тегін дәрі-дәр­мек­тер, міндетті әлеуметтік меди­циналық сақтандыру, саламатты өмір салтын ұстану бойынша түсіндірме жұмыстарын жүргізу жолға қойылған,– деді аудандық орталық аурухана бас дәрігері Нұржамал Мырзағалиева.

Аталған акцияның айма­ғымызда басталуына орай өнер­паздар ән-жырдан шашу шашты.

Айнұр БАТТАЛОВА.