Сыр бойы

 Жақында Нұр-Сұлтан қаласында өткен республикалық «Таңғы шұғыла»  байқауына сән үлгісі мен би және ән жанры бойынша Төретам кентіндегі №22 «Гауһартас» балабақшасының өнерлі бүлдіршіндері қатысты. 

Байқаудың бірінші күні топтың көр­кем­дік жетекшісі Айгүл Жолдыбаеваның бал­ғын бишілері «Көктем шапа­ғаты» атты биді қойса, келесі күні хореограф Жансая Айдәу­ле­тованың «Бал қымыз» биімен көрермен көзайымы атанды. Осылайша жас бишілер қазы­лар алқасының шешімімен бай­қаудың бас жүлдесін жеңіп алып, Сыр мерейін асырды.

Сондай-ақ,  байқауда ән жанры бо­йынша «Мен бақытты баламын» атты әнін нақышына келтіре орындаған балғын ән­ші­лер Айзере Шынжырбаева  мен Гүл­сезім Досмахан жүлделі ІІ орынды иеленіп, алғыс хаттармен және ескерткіш медальдармен марапатталды.

Байқау барысында осындай дарынды шәкірттерді тәр­биелеген балабақша басшысы Ботакөз Ахмет, тәрбиеші Айгүл Жолдыбаева және хореограф Жансая Айдәулетова да  арнайы дипломдарға ие болды. 

«Гауһартас» бала­бақ­ша­сының балғын өнерпаздары, атап айтқанда, Айзере Шынжырбаева, Айым Меңдіқара, Гүлім Мең­діқара, Айару Ержанова, Інжу Бақ­берген, Гүлсезім Досмахан, Аймерей Советова, Раяна Асыл­­қанқызы және Айару Бай­мұратова мен Аниса Маликовалар елорда төрінде ән шырқап, мың бұрала билеген биімен дүйім халықтың қошеметіне бөленді.

Енді жас өнерпаздар мау­сым айында Түркияда өтетін халық­аралық байқауға қаты­сады.

Нұрбай ЖАНӘДІЛОВ.

Байқоңыр қаласы.