Сыр бойы

Өткен жылдың қорытындысымен Шиелі ауданы агроөнеркәсіп саласындағы жетістіктері үшін облыста І орынды иеленіп, «Үздік аудан» атанды. Аудандағы өзге де жетістіктер жайында өңірлік коммуникациялар қызметінде өткен брифингте аудан әкімі Әшім Оразбекұлы айтты.

Былтыр ауыл шаруа­шы­лығы саласы бойынша 21 млрд 328 млн теңгенің өнімі өндіріліп, 2017 жылмен салыс­тыр­ғанда өнім өндіру 103,3 процентті құраған. Диқандар 12627 гектар күріштің әр гектарынан 57 центнерден өнім келтіріп, 71 974 тонна астықты қамбаға құйған. Сондай-ақ, көкөніс, бақша дақылдары да мол алынды.

– Ауыл шаруашылығы өнім­де­рінің экспорттық әлеуетін арттыру бағытында былтыр Ауғанстан Республикасына 476 тонна күріш, Ресейдің бір­қатар облыс орталықтарына 10 тонна балық, 702 тонна бақша және 95 тонна көкөніс өнімдері экспортталды. Еліміздің сол­түстік, батыс, орталық өңір­леріне 3500 тонна қауын, 3150 тонна қарбыз, 456 тонна қы­занақ пен 580 тонна қияр жөнелтілді,–деді аудан әкімі.

Әшім Оразбекұлының мә­лімдеуінше, аудан соңғы кезде балық шаруашылығын дамыту бағытында да ауқымды жұмыстарды қолға алуда. Атап айтқанда, балық шаруа­шы­лығымен айналысатын кооператив құрылып, 80 адам жұмыспен қамтылып отыр. Аудандағы 29 көлден 56 тонна балық ауланып, бюджетке 6 млн 800 мың теңге салық түскен.

Индустрияландыру бағдар­ла­масына сәйкес өнер­кә­сіп өнімінің көлемін арттыру бағытында 3 жоба жүзеге асырылуда. Оның біріншісі, жобалық құны 64 млрд теңгені құрайтын жылына 1 млн тонна тампонажды цемент шы­ғару зауыты. Зауыт былтыр жел­тоқ­санда Елбасының қаты­суымен жалпыұлттық теле­көпір барысында іске қосылып, 260 тұрақты жаңа жұмыс орны ашылған.

Екіншісі, «Фирма Балауса»  кәсіпорнының құны 125 млн АҚШ долларын құрайтын өңдеу жобасы. 2018 жылы экспорт көлемі 3,2 есеге ұлғай­тылып, 1,4 млрд теңгені құрай­тын 200 тонна аммоний мета­ванадатын экспорттады. Қазіргі таңда кәсіпорында 147 адам жұмыс жасайды.

Үшіншісі, жобалық құны 2,5 млрд теңгені құрайтын «Сыр Агро и К» ЖШС «1200 бас ірі қара малына арналған тауарлы сүт фермасы» жобасы аймақтық үйлестіру кеңесіне ұсынылып, қолдау тапқан. Жоба жүзеге асқан кезде тәу­лігіне 15 тонна сүт өнімі өндірілетін болады.

Цифрландыру ­бойынша уран шикізатын өнді­руші №6 кен басқармасы мен «Семізбай-U» ЖШС тех­но­логиялық процестерді бас­қа­ратын «Ақылды кеніш», «Ақылды қала» жобасы аясында «көшені ақылды жарық­тандыру» жүйесін енгізу жос­парланса, облыстық бюджеттен 19 млн 200 мың теңге бөлініп, «Ақмая» шаруа қожалығының егістік алқаптарын «Ақылды ферма» жобасы шеңберінде цифрландыру жұмыстары жүр­­гізілген. Қазіргі таңда ауыл шаруашылығы тауар өн­діру­шілерінің егістік элек­трондық картасын қалып­тастыру жұ­мыстары қарқынды қолға алынып, 29633 гектар жердің электронды сызбасы жасалған.  «Агробиржа» электрондық сауда сайты іске қосылып, оған 37 шаруа қожалығы тіркелген.

Денсаулық, білім салаларын цифрландыру бойынша да бірқатар жұмыстар атқарылуда.