Сыр бойы

Сыр перзенті, журналист  Мәди Манатбектің есімі елге етене таныс. «Ту ған жерге тағзым» акциясы аясында өңірге келген журналист Қорқыт ата атындағы ҚМУ-дың болашақ журналистеріне «Жаңа медиа: бүгінгі БАҚ және сөз бостандығы» тақырыбында семинар-тренинг өткізді. 

Осы кезге дейін «Қазақстан» РТРК» АҚ Басқарма төрағасының орынбасары, «BAQORDA media group» ЖШС бас директоры, «Қазақ радио­лары» ЖШС бас директоры қызметтерін атқарған журналист қазіргі ақпараттар аламанында медиа өнімді сапалы етіп ұсынудың жолдарын баян етті.

– Журналистің азаматтық ұстанымы берік, қоғамның түйінді тұсын тап басатын қырағы, тәуекелшіл болуы еңбегінің өнімді болуының басты себебі. Журналист – қоғамның барометрі. Ол басқалар байқамағанды байқап, ел мәселесіне сергектік танытып, бұқараға жеткізіп қана қоймай, шешімін ұсына білуі қажет, – дейді ол.

Сондай-ақ, журналистердің осы сала бойынша университетте төрт жыл білім алуына қатысты өз пікірін білдірді.

– Журналистің бірінші сабағы – өмірдің өзі. Бүгінде медиа саласы бойынша семинар-тренинг, курстардың көбеюінің себебі осында. Ақындықты мамандық етіп оқыта алмайсың, журналисті де дәл солай. Тілші кәсіби тұрғыда жетілуі үшін өзіндік қабілеті, ұстанымы және тәжірибе қажет, – деді Мәди Манатбек.

Жиында ақпаратты кең көлемде ұсыну үшін интер­неттегі, әлеуметтік желідегі аудиторияны да қамту керек екенін еске салды. «Қазақ радиоларын» басқарған уақытта бағ­дарламалардың әлеу­мет­тік желідегі нұсқаларын да ұсынғанын айтып, тәжіри­бе­сімен бөлісті. Семинар-тренинг барысында студенттер сауалына жауап беріп, тілшілік тіршілігіндегі сындарлы сәттерімен, қызықты оқиғаларымен бөлісті.