Сыр бойы

 «Нұр Отан» партиясы облыстық филиалы жанындағы «Мирас» қоғамдық кеңесінің кезекті отырысы өтті. Жиында Елбасының «Ұлы даланың жеті қыры» мақаласын талқылау мен аймақтағы дарынды шығармашыл жастарға қолдау көрсету бағытындағы жұмыстар пысықталды.

– Елбасы жуырда «Ұлы даланың жеті қыры» атты мақаласын жариялады, біз оны ұлт тарихын танудың жаңа кезеңі ретінде ауқымды «Рухани жаңғыру» бағдарламасында көрсе­тілген бағыттардың жалғасы деп қарауымыз керек, – деді жиынды ашқан «Нұр Отан» партиясы облыстық фи­лиалы төрағасының бірінші орынбасары И.Құт­тықожаев.

Жиын барысында Елбасының ма­қаласы аясында облыстық «Мирас» кеңесінің мүшесі, Қорқыт ата атындағы Қызылорда мемлекеттік университетінің «Қорқыттану және өлке тарихы» ғылыми-зерттеу инс­титуты директоры, филология ғы­лымдарының докторы, профессор Бағ­дат Кәрібозұлы баяндама жасады.

Елбасы өз мақаласында ежелгі дәу­ірден қазіргі заманға дейінгі ке­зең­ді қамтитын барлық отандық жә­не шетелдік мұрағаттар дүниесіне іргелі зерттеулер жүргізу үшін «Архив-2025» жетіжылдық бағ­дар­ламасын жасау мен бұл жобаны жүзеге асыру барысында тарих­шы­лардан, деректанушылар мен мәдениет­тану­шылардан құрылған арнайы топтардың отандық және шетелдік ірі архивтермен өзара жүйелі әрі ұзақ мерзімді ықпалдастықта болып, зерттеу жұмыстарын жүргізу қажеттігін атап өтті. Осы бағытта облыстық мәдениет, архивтер және құжаттама басқармасы басшысының орынбасары Ә.Ерсұлтанов толығырақ айтып өтті.

– Мазмұны бай, деректік жағынан терең архив қорын қалыптастыруда 90 жылдық тарихы бар Сыр елінің архив саласы қарқынды дамуда. Облыс әкімінің қол­дауымен 2010 жылдан бері «Электронды архив» бағдарламасын енгізіп, архивтік құжаттарды цифрлық фор­матқа көшіре бастадық. Осы уақытқа дейін архив құжаттарының 13 пайызы сандық форматқа өтті. Ежелгі дәуірден қазіргі заманға дейінгі кезеңді қамтитын барлық отандық және шетелдік архивтерге зерттеу­лер жүргізу үшін «Архив-2025» жеті­жылдық бағдарламасын жасау бүгінгі күннің талабы. Бұған дейін 2004 жылы қабылданған «Мәдени мұра» бағдарламасы аясында облыстың мем­лекеттік архивінде еліміздің тарихы мен мәдениетіне қатысты отан­дық және шетел архивтерінен 160 құжаттың көшірмелері алынды, – деді Әділбек Ерсұлтанов.

Жетіжылдық бағдарлама аясында Өзбекстан, Ресейдің Орынбор, Мәскеу, Екатеринбург, Санкт-Петербург мемлекеттік архивтеріндегі қазақтардың шығу тарихы, қазақ хандықтары, Сыр өңірі тарихына қатысты құнды құжаттардың көшір­мелерін Ұлттық архив қорына қабыл­дап, көпшілікке қолжетімді етіп, цифрлық форматқа енгізу жоспарланып отыр.