Сыр бойы

Қызылорда қаласындағы көркемсурет галереясында Түркістан облысындағы «Отырар» мемлекеттік археологиялық қорық-музейінің

«Киелі Отырардың қасиетті мұралары» атты көрмесі қойылды.

Көрменің ашылу салтана­тында облыс­тық «Рухани жаң­ғыру» орталығының бөлім басшысы, филология ғылым­да­рының кандидаты Серікбай Қосанов Елбасының жақында жарық көрген «Ұлы Даланың жеті қыры» мақаласында ар­хеология сала­сының бола­шақ­тағы бағдары жайында қам­тылғанын айтты.

Тарихы терең Отырар жай­ында ой қозғай келе, он­дағы құнды жәдігерлерді Сыр жұртшылығына ұсын­ған музей ұжымына алғы­сын білдірді. «Отырар» мемле­кет­тік археологиялық қорық музейінің бас қор сақтаушысы Ералы Шоқай  Отырар өлке­сінің тарихы ертеден басталатынын жеткізді.

– Бұл көрме жетінші рет өтіп отыр. Отырар тарихынан сыр шертетін дүние­лерді жергілікті тұрғындарға насихаттау мақсатында өткізілетін көрме шет мемлекеттерде де ұйымдастырылуда, – деді ол.

Сондай-ақ, жиында бас қор сақтаушы «Отырар» мем­лекеттік археологиялық қо­­рық-музейінің қолөнер ше­бер­лері жасаған туындыны тарту етті.

Археологиялық қорық-му­зей көрме­сіне келгендер Х-ХVІІІ ғасырларға тән ар­хео­­логиялық тұрмыстық бұй­ымдар, ну­мизматикалық және зергерлік  заттар, қару-жарақ түрлері,  әйгілі Қожа Ахмет Ясауидің ұстазы атанған Арыстанбаб және оның кесенесі туралы тарихи деректемелермен танысты. Көрмеде барлығы 200-ге жуық   жәдігер  ел назарына ұсынылды.

Жалпы, «Отырар» мемле­кеттік архео­ло­гиялық қорық-музейі 1979 жылы ашыл­ған. Музейдегі 25 мыңнан ас­там құнды жәдігердің  бар­лығы дерлік түпнұсқа. Му­зей  қорында V-XVIII ға­сыр аралығын қамтитын  жәді­гер­лер сақтаулы.