Сыр бойы

 

Биыл құқық қорғау органдары қызметін жетілдіруге бағытталған заң қабылданды. Соған сәйкес еліміздегі барлық “Ішкі істер департаменттері” “Полиция департаменті” болып, ал қалалық ішкі істер басқармасы және барлық аудандық ішкі істер бөлімдері сәйкесінше полиция басқармасы мен полиция бөлімдері болып өзгертілді. Сондай-ақ, өз кезегінде полиция департаментінің басшысы әкім мен халық алдында жылына кем дегенде бір рет есеп беруге міндеттелді. Осы орайда облыстық полиция департаментінің бастығы Қайрат Мұқитов тұрғындарға  есеп берді. Шараға облыс әкімінің орынбасары Серік Сүлейменов, облыстық мәслихат хатшысы Наурызбай Байқадамов мекеме басшылары, мәслихат депутаттары, ҮЕҰ мүшелері мен өңір тұрғындары қатысты.

Департамент басшысы осы жылдың он айында атқарылған жұмыстарды саралады. Айтуынша, 10 айда облыс көлемінде 5968 қылмыс тіркеліп, өткен жылмен салыстырғанда 14 процентке төмендеген. Бүгінгі күні полиция қызметін бағалаудың бір критерийі ретінде 10 мың ха­лыққа шаққандағы қылмыс­тылық деңгейі өңірде 91 қыл­мысты құ­райды. Бұл көрсеткіш бойын­ша республика көлемінде кри­ми­но­гендік ахуал тұрақты, әрі Маңғыстау, Жамбыл облы­сы­­нан кейінгі қауіпсіз үш об­лыс­тың қатарында тұр. Сондай-ақ, қоғамдық орындарда, кө­ше­­лерде, мас күйінде және қа­руы­­мен жа­салған қылмыстар дең­гейі де азайып отыр. Ал, есірт­кінің заң­­сыз айналымымен кү­рес ба­ғы­тында республика кө­ле­мінде «Көкнәр-2018» жедел про­фи­лак­тикалық іс-шарасы өткі­зілген. Ша­ра аясында депар­таментте «Де­льта-Сырдария» есірткі биз­несіне қарсы күрес бөлінісі құрылып, жұмыс тиімділігін арттыру мақсатында бірнеше жедел-іздестіру топтары жасақталған. Нәтижесінде есепті мерзімде 319 есірткі қылмысы тіркеліп, заңсыз айналымнан жалпы 132 кг есірткі заты тәркіленген. Оның ішінде, есірткі өсірудің 73 дерегі анықталып, жалпы салмағы 10 тоннадан астам болатын 74 мың түп сора өсімдігі жойылған.

– Есірткіге  қанша тосқауыл қой­ылғанмен, қылмыскерлер оны егу­дің басқа тәсілдеріне кө­шуде. Мәселен, үй ауласында, сая­жайларда есірткі егу деректері  анық­талып, оған қарсы жұмыстар  қар­қынды жүргізілуде. Жалпы алдын алу, есірткіге қарсы күрес шара­ларының нәтижесінде нарко­диспансерде есепте тұрғандар са­ны 5 процентке азайды, – деді Қ.Мұ­қитов.

Жиын барысында патрульдік полиция қызметі мен жол қоз­ға­лысын бақылау бойынша атқа­рылған жұмыстар да айтылды. Сон­дай-ақ, облыс орталығында қо­ғамдық қауіпсіздікті қамта­ма­сыз ету мақсатында орнатыл­ған 272 бейнебақылау камерала­рының көмегімен 15 мыңға жуық әкімшілік құқық бұзушылық анықталып, 60-тан аса қылмыс ашылғандығы сөз болды. Осы ретте аймақта «Цифрлық Қазақстан» бағдарламасы негізінде қосымша 1400 дана бейнебақылау камераларын орнату үшін адрестік бағдарлама бекітілген көрінеді. Ал, сандық технологияларды дамыту аясында полиция қызметіне «Электрондық қылмыстық іс жүйесі» жобасы енгізіліп, қазір­гі уақытта қылмыстық істер элект­рондық форматта тергелуде. Бұл жүйе тергеу жұмыстарының жыл­дамдығын арттырып, қадағалау органдарымен қылмыстық істер­дің тергеу барысын электронды түрде бақылап отыру мүмкіндігін туғызады. Сонымен қатар, іс-құжаттардың бұрмалануына жол бермеу, қылмыстық істерді тер­геу барысында сыбайлас жем­қорлық көріністерін жоюға өз ық­палын тигізбек. Қазіргі таң­да, электронды форматта 315 қыл­мыстық іс тергеліп, оның 182-і сотқа жолданған.

– Бізде өткен жылдың  қазан айынан бастап «Әкімшілік іс жүргізудің бірыңғай тізілімі» (ЕРАП) жобасы да іске қосылып, жергілікті полиция қызметіне 29 дана планшет берілсе, осы жы­лы қосымша 117 электронды план­шеттер алынып, қолданысқа ен­гізілді. Оның көмегімен бүгінгі күні 9 мыңнан астам әкімшілік хаттамалар толтырылды. Сондай-ақ, құқық бұзушылық жасалған орында әкімшілік хаттамалар электронды түрде рәсімделіп, сол мезетте Құқықтық статистика және арнайы есепке алу жөнінде басқармаға тіркелуде.  Биылғы жылы жүзеге асқан ауқымды жұмыстардың бірі облыстық бюджет есебінен Жалағаш аудандық полиция бөлімі және Арал ауданы, Сексеуіл кентіндегі полиция бөлімшесінің жаңа ғимараттары бой көтеріп, қолданысқа берілсе, департаменттің жеке құрамының әскери жауынгерлік дайындығын үнемі жетілдіру мақсатында Бел­көл кентінің маңында зама­науи оқу-жаттығу полигоны құры­лысының жүргізіліп жатқан­ды­ғын айта кеткен жөн, – деді Қай­рат Болатұлы.

Департамент басшысының жә­не атап өткеніндей, барлық по­лиция қызметкерлерін қайта­дан аттестаттаудан өткізу, тұрғын­дар­мен жұмыс жасаудың жаңа форматын енгізу, ол үшін барлық полиция бөліністерінде азаматтарды қабылдайтын арнайы фронт-офис ашу міндеті тұр. Бұл офис ЦОН үлгісінде халыққа қыз­мет көрсететін болады.

Жиын барысында қалалық полиция басқармасының бастығы Дәулет Беркімбаев та облыс орталығында атқарылған жұмыс­тар жөнінде есеп берді. Шара со­ңында тұрғындар тарапынан сұ­рақтар қойылып ұсыныстар ай­тылды. Оның ішінде мал ұр­лығы, Сабалақ саяжайына жаз­ғы мезгілде тәртіпті күшейту мақ­сатында учаскелік полиция қыз­меткерлерін бөлу мен бақылау пунктін салу, бейнебақылау орнату мәселесі қозғалды. Департамент басшысы барлық сұраққа нақты жауап беріп, маңызды мәселелердің алдағы уақытта өз шешімін табатындығын жеткізді.