Сыр бойы

 Өңірлік коммуникациялар қызметінде облыстық ішкі саясат басқармасының басшысы Т.Маханов, техникалық реттеу және метрология комитетінің облыс бойынша департаментінің бас маманы Серік Қасымовтың қатысуымен брифинг өтті. Онда ҚР Президентінің «Қазақ тілі әліпбиін кириллицадан латын графикасына көшіру туралы» Жарлығына сәйкес «Қазақстан Республикасының мемлекеттік рәміздері туралы» ҚР Конституциялық заңына өзгерістер енгізілгенін мәлімдеді.

– Осыған байланысты Қазақстан Республикасының Мемлекеттік Ел­таң­басы. Техникалық шарттар» ҚР СТ 989-2014 стандартына №1 өзге­ріс­­тер енгізіліп, алдағы уақытта  ұлт­тық стандарттың бүкіл мәтінінде «Қа­зақстан» сөзін латын графикасымен «QAZAQSTAN» етіп өзгерту, ΔE түстер диапазонын қолдану тура­лы шешім қабылданды.  Енді еліміз Елтаңбасының жаңартылған нұсқасында QAZAQSTAN сөзі қол­данылатын болады. Сонымен қатар, «Биб­лиография» тарауы Ж.Мә­лібе­ковтің «Қазақстан Респуб­ликасының мемлекеттік Елтаңбасы элементтерінің сипаты мен тарихы әдістемелік құра­лымен толықтырылды. №1 өзгерістерді қабылдау және қолданысқа енгізу туралы ақпарат http://egfntd.kz сайтында және стандарттардың кезекті ай сайынғы ақпараттық сілтемесінде орналастырылды. Елтаңбаны ауыстыру мерзімі шамамен 1,5-2 жылға дейін болуы мүмкін, – деді С.Қасымов.

Айта кету керек, елімізде өзгеріс­терді әзірлеу үшін арнайы жұмыс тобы құрылған. Оған Қазақстан Рес­­пуб­­ликасының Мемлекеттік Ел­таң­басы­ның авторы Жандарбек Мәлі­беков, сондай-ақ, дайындаушы ком­па­ниялардың өкілдері, «Мекен KZ» ЖШС, «Industrial Company Zoom» ЖШС, «Символика» ЖШС, «Алматыгороформление» ЖАҚ, «Ак бастау KZ» ЖШС, ЖК «Ж.С. Тынымбаев», ЖК «Баубеков» және мемлекеттік ор­гандардың өкілдері қатысқан.