Сыр бойы

Әйел – отбасының ұйтқысы, шаңырақтың берекесі ғана емес, шаруашылықтың қай саласында болсын, өзінің лайықты бағасын алып жүрген еңбеккер. Бүгінгі қоғамдағы шаруашылықтың қай-қайсысында болсын әйел қолының таңбасы барына сүйсінесің. Әлбетте, бұл – жаңа заманның тың талаптарының көрінісі. Әйелдердің қабілеті мен қарымы, ой-өрісі мен іскерлігі, еңбекқорлығы қашаннан жоғары бағаланады.

Қай істі болсын ұршықша иі­ріп әкететін әйелдердің тынды­рым­дылығы, тиянақтылығы мен ұқып­тылығы өз алдына, жаңа заманға бей­ім­делгіштігі мен із­денгіштігі де қадірін еселей түс­кендей. Нәзік жан­дылардың іскерлігі өздері қолға алған істен көрініс табады. Олар еліміздің әлеуметтік-экономикалық дамуы, өркениетті ел болуы жо­лын­да еңбек етіп, Қазақстан­ның өсіп-өркендеуіне сүбелі үлес қосып жүр. Өзіміздің ауда­нымыздан да әртүрлі кәсіп көзін ашып, зор еңбекпен ел ықы­ласына бөленіп отырған аналар аз емес. Солардың бірі – бүгінде ауданымызға аты кеңінен танымал «Талапкер» ЖШС директоры, кәсіпкер Раушан Ақышева.

Ол 1982 жылы Алматы қа­ла­сындағы жеңіл өнеркәсіп техникумын технолог мамандығы бойынша бітіріп, осы салада тех­нолог, цех меңгерушісі, ин­же­нер қызметіне дейінгі бас­палдақтардан өтті. Уақыт өте «Талапкер» серіктестігін құрып, ха­лық сұранысына орай жұмыс жүргізіп келеді.

– Әрине, алғашқы жылдары біршама қиындық болды, бірақ ұжыммен бірлесе кү­ре­се жүріп, мекемені тұрақты бір жолға қойдық. Бейнетсіз еш­теңе де болмайды. Бірақ бізді осы қиын кезеңдерден алып шық­қан «қалайда халыққа қыз­мет көрсетіп, ел үдесінен шы­ғамыз» деген сенім мен алға қой­ған үлкен мақсатымыз бол­ды. Қазіргі таңда тігін машина­ларының барлығы заманауи үлгімен жабдықталған. Алдағы уақытта кәсіп көлемін кеңейтіп, тағы да тұрмыстық қызмет түр­лерін қоспақпыз, – дейді мекеме директоры Р.Ақышева.

Қазіргі күнде «Талапкер» ЖШС-да 10 адам жұ­мыс істейді. Оның ішінде тігін­шілер, әсіресе осы салада біраз жыл еңбек атқарған тәжірибелі қызметкерлер бар. Мекемеде талаптарға сай етіп жасалған киім үлгісінің барлық түрлерін сәнді етіп тігу, заманауи үлгідегі жалюз түрлерін, тұрмысқа қа­жетті басқа да өнімдерді дайын­дау цехтары қазіргі таңда халық­қа сапалы қызмет көрсетіп ке­леді.

– Мекемеде 20-25 жылдан бері тігінші болып келе жатқан С.Қа­рабаева, Г.Досманова және басқа да қызметкерлер сұраныс берушілермен тікелей жұмыс жа­сап, көңілінен шығатын киім­дерді өлшеп-пішу және тігу­мен айналысады. Киім тігуге құл­шыныс танытып, арнайы оқып жүрген жас студенттер тәжірибе жинап, ұлттық құрақ көрпеше, ұлттық ою ойылған киімдер тігуді үйретіп шеберлігін шың­дап жатырмыз, – дейді мекеме басшысы.

Серіктестік жылдан-жылға өндір­ген өнімін және халыққа қызмет көр­сету сапасын өсіруде. Аудандық аурухана, мектептер мен балабақшалар, тағы басқа мекемелермен келісім шарт жа­сасып, сапалы жұмыс жасап келеді. Осындай тынымсыз еңбек етіп жүріп, бұл ұжым толағай табыстар мен үлкен жетістіктерге қол жеткізді. Атап айтар болсақ, 1998 жылы «Астана» медалімен, «Қазақстан Республикасы Тәуелсіздігіне 10 жыл» мерейтойлық медалімен, Қазақстан Республикасы Прези­дентінің «Құрмет грамо­тасымен», Қазақстан Респуб­ликасы­ның Экология және қор­шаған ортаны қорғау министрі Айткүл Самақованың «Әйел бас­қарған үздік мекеме» дипломымен, Қызылорда облысы әкімінің «Жылдың үздік кәсіпкері» дипломдарымен марапатталды. Сондай-ақ, 2002 жылдан бастап үш жыл қатарынан бірінші орын иеленіп, облыс әкімінің 2006 жылғы «Қазақстан үздік тауарлары» байқауының «Алғыс хатын» алды. Бұл әйел заты үшін біраз қажыр-қайрат көрсетіп, табандылық танытып, төзімділік талап ететін үлкен еңбекпен жететін жетістіктер.

Ал 2007 жылы «Талапкердің» абыройын тағы бір үлкен жетістік асқақтатты. «Қызылорда облысында шағын кәсіпкерлікті дамыту саласындағы жетістіктері үшін» көрме-конкурсында се­рік­тестік басшысы «Үздік әй­ел кәсіпкері» номинациясы бой­ынша жеңімпаз атанып, арнайы дипломмен марапатталып, ба­ғалы сыйлықтарға ие болды. Ас­тана қаласында өткен «Алтын сапа» байқауынан жүлделі оралып, «Үздік кәсіпкер» номинациясын иеленді.