Сыр бойы

Мемлекет басшысының тапсыр­масымен, Премьер-министр Бақытжан Сағынтаев пен Президент Әкімшілігінің басшысы Әділбек Жақсыбеков Жамбыл облысы мәслихатының кезектен тыс сессиясына қатысты.

Отырыс барысында Үкімет басшысы Бақытжан Сағынтаев Қазақстан Прези­дентінің облыс мәслихатының депутат­тарына бағытталған хатын оқып берді. Онда Жамбыл облысының әкімі қыз­метіне Асқар Мырзахметовты та­ғайындау туралы Елбасының ұсынысы жазылған. Депутаттар Президенттің ұсын­ған кандидатурасын бірауыздан қолдады.

Бұдан кейін Премьер-министр Бақытжан Сағынтаев пен Президент Әкімшілігінің басшысы Әділбек Жақсыбеков Жамбыл облысы активімен кездесіп, жиын барысында жаңа әкімді таныстырды. Асқар Мырзахметов бұған дейін вице-премьер және ауыл шаруа­шылығы министрі қызметтерін қоса атқарып келген болатын.

Бақытжан Сағынтаев облыстың бұрынғы әкімі Кәрім Көкірекбаевқа бір­лесіп атқарған жұмыс үшін алғыс айтты. Таныстыру барысында Б.Сағынтаев Асқар Мырзахметовтың түрлі жауапты бас­шылық лауазымдардағы мол тәжіри­бе­сін атап өтіп, жаңа басшылыққа Мем­лекет басшысының Қазақстан халқына арналған «Төртінші өнеркәсіптік революция жағ­дайындағы дамудың жаңа мүмкіндіктері» жолдауын өңірде іске асыру бойынша бірқатар нақты міндеттер қойды.

Сондай-ақ облыс активімен кездесу барысында «Қазфосфат» ЖШС бас ди­ректоры, «Еңбек ері» Мұқаш Ескен­діров, Жамбыл облысының қоғамдық кеңес төрағасы Жандар Кәрібаев сөз сөйледі.