Сыр бойы

Ш.Шаяхметов атындағы тілдерді дамытудың республикалық үйлестіру-әдістемелік орталығының ұйымдастыруымен Сәтбаев қаласында «Текті сөздің төресі – терме» атты дәстүрлі республикалық жыршы-термешілер бай­қауы өтті. Жыр додасына облыс атынан қатысқан Қорқыт ата атындағы мемлекеттік университетінің қызметкері, облыстық филармониясының дәстүрлі орындаушысы Сүгірбай Марат жүлделі ІІ орынға ие болды.

Республикалық байқауда Астана, Алматы қалалары мен 14 аймақтың жыр дүлділдері бақ сынады. Текті өнердің насихатшылары ел бірлігі мен Алашорданың 100 жылдығын жырға қосты. Ана тілдің тағдырын айтып, тыңдарманның көңілін дөп басты.

Өнерпаздардың шеберлігін айтыс ақындары мен жыршы-тер­мешілердің халықаралық ода­ғы­ның төрағасы Жүрсін Ерман, Қазақстанның халық ақыны Қо­нысбай Әбіл, жыршы, ҚР ең­бек сіңірген қайраткері Елмұра Жаңа­бер­генова, жырау, жыршы Мұқаш Қожахметов және Маңғыстау жыр­шылық мектебінің өкілі Амандық Көмеков бағалады.

Сондай-ақ, Ақмола облысы, Щучье көлінің жағалауындағы «Балдәурен» республикалық оқу-сауықтыру орталығында 18-22 жас аралығындағы қазақ, орыс және ағылшын тілдерін жетік меңгерген дарынды жастарды анықтау, қолдау мақсатында өткен «Тілдарын» республикалық ­олимпиадасында Арал қаласының Н.Крупская атын­­дағы №14 мектеп-лицейінің ағыл­шын тілі пәнінің мұғалімі Айдана Әбубәкірова жүлделі І орынды иеленді.

Мемлекеттік тілді оқытудың әдістемесін жетілдіру мақсатында «Тіл әлемі» порталы 4 тамыз-7 қыркүйек аралығында «Үздік са­бақ» байқауын жариялаған болатын. Байқауға республикалық тіл­дерді оқыту орталықтарының оқы­­тушылары мен әдіскерлерінен, мек­теп мұғалімдері мен сала мамандардан мемлекеттік тілді оқытудың сан түрлі әдіс-тәсілдері ұсынылды. Арнайы құрылған қомиссия бай­қауға жолданған 500-ге жуық материалдың 300-ін ғана іріктеп, сайтта жариялаған болатын.

Байқау қорытындысы бойынша Қызылорда облыстық ішкі саясат басқармасына қарасты «Қызылорда облысының тілдерді оқыту орта­лы­ғы» КММ-нің оқытушысы Әсел Бахытова 2-орын қол жеткізді.

Облысымыздың атын шығарып, тіл мерейін үстем еткен жастарымызға алар асулары көп болсын дегіміз келеді.

Мартана ДӘУЛЕТБАЕВА,

облыстық ішкі саясат

басқармасының әдіскері.