Сыр бойы

Қазақстан халқы Ассамблеясының бастамасымен Шымкент қаласында «Рухани жаңғыру» бағдарламасын жүзеге асырудағы Аналар кеңесінің рөлі» тақырыбында Республикалық Аналар кеңесінің кеңейтілген отырысы болып өтті.

Модератор Қазақстан Республикасы Президенті Әкімшілігінің Қазақстан халқы Ассамблеясы Хатшылығының меңгерушісі, Төраға орынбасары – Д.Мыңбай болды. Еліміздің әр түкпірінен жиналған жиын қатысушыларын Оңтүстік Қазақстан облысының әкімі Ж.Түймебаев өзінің жүрекжарды лебізімен қарсы алды.

Шараға отбасы, бала және әйел құқықтарын қорғау мәселелерімен айналысатын 170-тен аса қатысушылар – ҮЕҰ жетекшілері, облыстық, қалалық, аудандық Аналар кеңестерінің басшылары мен мүшелері қатысты. Қызылорда облысының атынан облыс әкімі аппаратының «Қоғамдық келісім» КММ директорының орынбасары Р.Ахметова, облыстық ҚХА жанындағы Аналар кеңесінің төрайымы Р. Смаханова, «Сырдария әйелдері» қоғамдық қорының жетекшісі, Сырдария аудандық Аналар кеңесінің мүшесі Ұ.Жаналиева, «Атамекен» отбасылық үлгідегі балалар ауылы директоры, облыстық АНК жанындағы Аналар кеңесінің мүшесі Л.Сқақова, Сырдария аудандық Аналар кеңесі мүшесі Е.Мясцова жиынға қатысып қайтты.

«Рухани жаңғыру» бағдарламасын жүзеге асыруда Аналар кеңесінің маңызы» тақырыбында Д.Мыңбай есеп берді. Отырыста қазақ халқының рухани мәдениеті негізіндегі қыз бала тәрбиесі, отбасылық тұрмыстық ортадағы құқық бұзушылықтардың алдын-алу, ұлттық ерекшелікті ескере отырып жастарды тәрбиелеу, жаңа Қазақстандағы ұлттық біртектілікті қалыптастырудағы отбасылық құндылықтардың ролін арттыру мәселелері талқыланды.

Кеңейтілген отырыста «Рухани жаңғыру» бағдарламасы аясында аймақтық және аудандық Аналар кеңестері жобаларының көрмесі ұйымдастырылды. Қызылорда облысынан облыстық Аналар кеңесімен бірлесіп, «Атамекен» отбасылық үлгідегі балалар ауылында жасақталған «Сыр – өнер ордасы» жобасы таныстырылды. Облыстық Аналар кеңесі мүшелері тәрбиеленушілерді ұлттық өнер негіздеріне үйретіп, жақсы жасалған жұмыстары көрмеге қойылды.