Сыр бойы

Мұсылмандардың ұлық мере­кесі – Құрбан айт биыл қыркүйектің 1,2,3 күндері өткізілмек. Айт намазы қаланың барлық мешітінде таңғы сегізде оқылады. Өңірлік коммуникациялар қызметінде өткен баспасөз конференциясында ҚМДБ-ның Қызылорда облысы бойын­ша өкілі, орталық «Ақмешіт-Сырдария» мешітінің бас имамы Талғат Омаров Құрбан айт мейрамында ұйымдастырылатын шараларды мәлімдеді.

– Үш күнге созылатын мейрам жыл сайын хижра-мұсылман күнтізбесі бойынша Зүлхижа айы­ның оныншы жұлдызында және Ораза айт мейрамынан 70 күн өткеннен кейін басталады. Бұл күні мұсылмандар мешітте айт намазын оқып, айтулы мерекенің ең маңызды рәсімі – құрбандық шалады. Құрбан айт мерекесіне орай, орталық «Ақмешіт-Сырдария» мешіті тарапынан аз қамтамасыз етілген отбасыларына ет таратылатын болады. Айттың бірінші күні орталық мешіт алаңында ұлттық нақышта киіз үйлер құрылып, дас­тархан жайылады, – деді Т.Омаров.

Айт күндері аймақ мешіт­терінің жанынан санитарлық та­лап­тарға сай қасапхана жұмыс істейді. Брифингте құрбандыққа шалынатын малға қойылатын та­лап­тар, қасапшылардың талап пен ережелерді толық сақ­тауы, құр­бандық шалудың маңыз­дылығы туралы толық ақпарат берілді.

– Айта кету керек, айт намазына дейін шалынған мал тек отбасы үшін сойылған ет ретінде ғана есептеледі. Сондықтан айт намазы оқылмай құрбандық шалынбауы тиіс. Кез келген мал құрбандыққа жарамайды. Құрбандыққа қой, ешкі, сиыр, түйе секілді мал жарамды, – деді бас имам.

Айта кету керек, бүгінде құр­бандық шалудың мәнісінің кеңдігін, құлшылықтың не үшін жасалатынын ұғына бастаған мұсыл­ман қауымы көбейіп ке­леді. Өткен жылы облыс бойынша Құрбан айт мерекесінде 500 отбасына 6 тонна ет таратылды. Айтта осындай амалдарды жасау қоғамдағы адамдардың бір-біріне деген сыйластықтарын, қайы­рым­дылығын барынша арттырмақ.

Ш.АЛТЫНБЕКҚЫЗЫ,

Н.НҰРЖАУБАЙ (сурет).