Сыр бойы

Жуырда Астанадағы құлашын кеңге жайған ауқымды шараға, әлеуетін әлемге танытқан “Экспо – 2017”-ге қатысып қайттым. Мақсатым – қиян шеттегі қазақ елінің абыройын асқақтатқан көрмеге өз үлесімді қосу, 100-ден астам шебердің бұйымы қойылған “Шебер-Керуен” қолөнершілер жәрмеңкесіне қатысу болды. Делегация құрамымен арман қала – Астанаға табан тіресімен бойымызды мақтаныш сезімі биледі. Себебі, қала көркіне көз тоймайды. Мұнда оңтүстіктегідей аптап ыстық жоқ. Жанға жайлы Сарыарқаның қоңыр лебі есіп тұр. Қай жерге қарасаңыз да, қыдырыстап жүрген халық. Балалар мәз-мейрам, жүздерінен шаттық лебі еседі. Әлем елдерінің түкпір-түпкірінен келген меймандарды айтсаңызшы! Бас қаланы аралап, таңдай қағысуда. Көрмеге деген қызығушылықтары жоғары. Олар әсіресе “Керуен” сауда орталығында ұйымдастырылған жәрмеңкеге көптеп жиналды. Бұл күні сәнге шыққан заманауи ұлттық нақыштағы киім топтамалары мен қыз-келіншектердің алуан түрлі сәндік әшекейлері көздің жауын алып, қаз-қатар тізіліп тұрды. Мен де сұлу Сырдан әкелген бұйымдарымды ұсынуға мүмкіндік алдым. Негізінен табиғат элементтерін, ертегі кейіпкерлерін бейнелейтін ойыншықтар дайындап жүргеніме 12 жылдан асты. Әрбір бұйымымды жасар алдында, кейіпкер бейнесін келістіруде көбіне қазақ халқының ұлттық аңыз-әңгімелеріне, қиял-ғажайып ертегілеріне жүгінемін. Әкем де – ағаштан түйін түйетін шебер жан. Отбасымызда ұл бала болмағандықтан, кішкентайымнан әкеме көмектесіп жүріп, киелі өнердің қыр-сырына қанық болып өскен едім. Кейіннен көрмелерге шығып жүргенде киізден ойыншықтар жасауға болатынын байқап, осы салаға ойыстым. Бүгінде нәтижелі еңбектің арқасында болар, Қазақстан қолөнершілері одағымен бірлесіп ұйымдастырылған жәрмеңкеде ұлттық дүниелерді шетелдіктерге таныстырып, насихаттауға үлес қостым. Ерекше әсермен туған өлкеге оралдым. Өздеріңіз білетіндей, шараның аяқталуына әлі біраз уақыт бар. Сондықтан жерлестеріме керемет көрмені тамашалауға кеңес беремін. Өйткені, мың естігеннен бір рет көрген артық.