Сыр бойы

Елбасының  «Болашаққа бағдар: рухани жаңғыру» атты бағдарламалық мақаласында атап көрсетілгендей, туған өлке тарихын, ұлттық салт-дәстүрімізді, тілімізді, әдебиетіміз бен мәдениетімізді, жалпы руханият өкілдерін  бағалау мен насихаттаудың маңызы зор.  

Қорқыт ата атындағы Қы­зыл­орда мемлекеттік уни­вер­­ситетінің ғылыми-тех­ни­калық кітапханасы, облыстық «Рухани жаңғыру» орталығы,  «Қазақ тілі мен әдебиеті және журналистика» кафедрасы жа­­нындағы Ә.Қоңыратбаев атын­дағы әдебиет үйірмесі бірлесе «Рухани жаңғыру» бағдарламасы ­аясында «Сыр елі інжу-маржаны» тақы­ры­бын­да Сыр бойы ақын-жазу­шы­ларының шы­ғарма­ларын наси­хаттауды қолға алған болатын. Осы мақсатта қазақ поэ­зиясының көрнекті өкілі, аяулы ақын, халықаралық «Алаш» әдеби сыйлығының лау­­реаты Ибрагим Исаевтың 70 жыл­ды­ғына арналған «Сағым дүние» еске алу кеші өтті.

Кешке университеттің оқы­­­тушы-профессорлары, сту­­­денттер мен кітап­ха­на­шы­лар және ҚР білім саласына еңбегі сіңген ұстаз Д.Торғаева, Қазақстан Жазушылар одағының мүшесі Н.Рахмет, облыстық «Рухани жаңғыру орталығының бөлім мең­герушісі, ҚР еңбегі сіңген  құрметті ұстаз Ә.Әбдіхалықова, ақынның қарындасы Ә.Исаева қатысты.

Ғылыми-техникалық кітап­ха­­наның бөлім меңгерушісі  Р.Доспаева бүгінде Сыр хал­қының рухани азығына ай­налған 200 томдық «Сырдария кітапханасы» антологиясы туралы қысқаша мәлімет берді. 

– Кезінде облыс әкімдігі және Қорқыт ата атындағы ҚМУ ғалымдары, оқытушы-профессорларының қол­дауы­мен құрастырылған «Сырдария кітапханасы» жинағы  ежелгі шығыс әлеміне белгілі ғұламалар Қорқыт ата, Қожа Ахмет Яссауи хикметтері, «Мың бір түн» ертегілерінен бастау алып, Сыр сүлейлерінің жұмбақ, айтыс, қисса сынды жанрлық түрдегі шығармалары топтастырылған, сондай-ақ ке­­­­­ңес дәуірі кезіндегі ауызша және жазбаша әдебиетінің көрнекті өкілдерінің бұрын бас­паға жарияланбаған ең­бек­тері қамтылған. Аталған жи­наққа ақын Ибрагим Исаев­тың екітомдық өлеңдері мен  мың­нан аса ән мәтіні енгізілген, – дейді ол.

Университеттің профессоры Ұ.Жанбершиева ақын И.Исаевтың ән мәтіндері туралы баяндамасында ақын­ның шығармашылығы жас­­тарға патриоттық рух беріп, адамгершілік қасиет­терге, ел­жан­дылыққа тәрбиелей­тін­дігін атап өтті.

Талантты студент жастар ақын өлеңдерін жатқа оқып, әндерін орындап, өздерінің жүрек­жарды  арнауларын тар­ту етті. Жастарды сөз өне­ріне баулып жүрген ғалым Ш.Бекмағанбетов И.Исаевтың ата-баба арманын еске салатын «Алдаспан» атты өлеңінде ақын аманаты жастарға зор сенім артатынын айтты. Сонымен бірге, Ә.Қоңыратбаев атындағы әдеби үйірме жетекшісі, доцент А.Айтбаева қазақтың көрнекті ақыны Т.Молдағалиевтің И.Иса­­ев ту­ралы тамаша толға­нысын жеткізіп, осы орайда «Ибрагим ақынның жан жүре­гінде ерекше нәзік лирикаға тұнған ішкі сазы бар» деген пікірін білдірді.

Алматыда бір ұлың сәлем деді дегейсің,

Сәтін салса құдайым, келем деді дегейсің.

Көңіл-күйін байқатпай, кейде жүрер жол таппай,

Сағыныштың сызығы те­рең­деді дегейсің, – деп өзі жырлағандай, Сырдың сыршыл ақыны Ибрагим Исаев есімі салиқалы жырымен, сазды әндерімен ел есінде сақтала бермек.

Ғазиза ӘБІЛДА.