Сыр бойы

Адамзат тарихындағы әділетсіздік пен қиянаттың құқайын бастан кешкен әулетте өмірге келіп, өзінің қанға сіңген қайсарлығымен ғұмыр кешкен ұлағатты ұстаз, Қазақ КСР-нің еңбек сіңірген мұғалімі Зағипа Қарақызы 2019 жылдың 29 қаңтар күні 88 жасында дүниеден өтті.

Ол Алаш арысы, Орта Азия мен Қазақстанға ортақ тұлға, түркі жұртының білімі мен мәдениетіне орасан зор үлес қосқан қайраткер Темірбек Қараұлы Жүргеновтің туған қарындасы болатын.  

Темірбектің әкесі Қара да, оның ұлдары – Қосжан, Досжан, Ысқақ, Кәпназар, Айназар да кеңестік дәуірдің жойдасыз жаласынан жазықсыз ажал құшты. Сөйтіп бір отбасынан «халық жауы» деген желеумен 7 адам саяси  қуғын-сүргіннің құрбанына айналып, ату жазасына кесілген.

Қайран боздақтың жары Дәмеш Ермекова да «халық жауының әйелі» деген әсіре айыптаумен «АЛЖИР» түрмесінің азабын тартты. 

Т.Жүргенов ату жазасына кесілгенде отбасының кенжесі Зағипа әлі 7 жасқа толмаған еді. Қаршадайынан тағдыр теперішін тартып, қасірет көрген Зағипа Қарақызы 1931 жылы Қарағанды облысы Жаңарқа ауданында туған.  Бұл кезде жер аударылған әкесі Қара Жүргенұлы Қарқаралы округiнде жүрген болатын.

Зағипа Қарақызы Қазақ мемлекеттік университетінің филология факультетін бітірген. Зейнет демалысына шыққанша Алматы облысының бірнеше аудандарындағы мектептерде қазақ тілі мен әдебиеті пәнінен дәріс берген. Осылайша, өмірінің соңына дейін жас ұрпақты ұлттық рухта тәрбиелеген тұлғаға айналды.

Зағипа ана Қарқаралы топырағының тумасы Мұқыжан Смағұловпен отасып, дүниеге 2 ұл, 1 қыз әкеліп, олардан 4 шөбере сүйген әзиз әже атанды.   

 Қазасы халықты қайғыртқан асылдардың көзі Зағипа Қарақызының денесі Алматы жанындағы Қарғалы ауылының қорымына жерленді.

Атамекеніңіз Сыр елі сізді ешқашан естен шығармайды, аяулы Зағипа ана!