Сыр бойы

Тоқсаныншы жылдары қара шаңырақ, Н.Гоголь атындағы педагогикалық инсти­туттың қазақ тілі мен әдебиеті кафедрасына алғаш мең­ге­рушілікке ұсынылған кезім. Осы тұста кафедраға Алматының С.Киров атындағы Қазақ Ұлттық мемлекеттік университетін “Фило­логия, қазақ тілі мен әдебиеті пәнінің оқытушысы” мамандығы бойынша тәмамдаған жап-жас қыз Білім және ғылым министрлігінің жолдамасымен келіп орналас­ты. Өзін Гүлмира Баялиева деп таныстырды, жымия күлімсіреп. Қуана қарсы алдық. Бізде ҚазМҰУ секілді оқу орнын бітірген мамандар жоқ­тың қасы болатын.

Міне, сол сәттен бастап Гүлмира өзінің кәсіби біліктілігін көрсетіп, шоқтығы биік мамандықтың мәртебесін арттыруға атсалысты. Оны қарапайымдылығы мен ұқыптылығы, еңбекке деген ынты­зар­лығы ерек­шелендірді. Кафедраның толып жатқан қоғамдық жұмы­сына араласты. Ұйымдастыру қабілеті, үлкендерге деген ілтипаты өзгеше еді. Содан болар, үлкенді де, кішіні де, қатарластарын да ұйыта, ұйым­дастыра білді. Сүйікті ісін мазмұнды, сапалы жүргізуді жолға қойды, жүрек жылылығын, мерейлі шуағын, адамгершілік ұлылығын шәкірттерінің бойы­на дарытты. “Білім алушыларға сындарлы оқытуды қолданудағы мақсат”, “Коммуникативтік білім берудегі жеке тұлғаға бағыттап оқыту принциптері” секілді бір­сыпыра ғылыми мақалаларға, әдіс­темелік еңбектерге авторлық етті. Қалалық, облыстық, республикалық конференцияларға қатысты. Ғы­лымға ден қойды. Тынымсыз жолда бағындырған белесі биік. Танымал ғалым, филология ғылымдарының докторы, профессор Берік­бай Сағындықұлының жетек­шілігімен Гүлмира “Хибат-ул хақайық”, “Құдатғу білік жәдігерліктері бойынша” деген тақырыпта кан­дидаттық диссертацияны жоғары дәрежеде қор­ғады. Бұл – мол ізденіс пен мақсатқа деген берік­тіктің нәтижесі еді.

Гүлмираның еткен еңбегі ескерусіз емес. Оның ел игілігі жолында атқарған ісі көпке үлгі. Көпжылдық еңбек өтілінде бірнеше марапатқа ие болып, жетістіктерге қол жеткізді. “Халықаралық ақпараттандыру акаде­миясының академигі” атағын иеленді. “Желтоқсанның 30 жылдығы” есте­лік медалімен, Тәуелсіздіктің 25 жылдығына орай қала әкімінің Алғыс хатымен марапатталды. Оның лектор ретіндегі тағылымын да айрықша атап өткен жөн. Себебі, Гүлмираның дәрісін тыңдаған студенттер еркін ойлау мүмкіндігіне ие болғанын айтады. Бүгінде шәкірттері арасынан жемісті қызмет етіп, көпке танылып жүрген азаматтар бар.

Мәдениеттіліктің ең жоғары сатысы – қарапайымдылық болса, біз Гүлмираның бойынан осы қасиеттерді көріп келеміз. Жас ұрпақты сапалы біліммен сусындатуды өмірінің ұстанымы еткен абзал жан ортасына осынысымен сыйлы. Ол – өз ісінің шебері ғана емес, аяулы жар, қамқор ана. Бүгінде жолдасы Бозғұланмен бірге 3 бала тәрбиелеп-өсірді. Қазір үлкені Айдана – Назарбаев университетінің механикалық инженерия саласында магистр, Жасұлан Қорғаныс және аэроғарыш өнеркәсібі министрлігі Стратегиялық жоспарлау департаментінің жобалық жұмыстар басқармасында сарапшы-экономист қызметін атқарады. Кенжесі Әкежан Назарбаев зияткерлік мектебінде оқиды.

Қоғамда ұлағат ие­леріне деген құрмет қашанда бөлек. Мерейлі жасқа қадам басқан Гүлмирадай ұстаздың да білім ордасындағы орны ерек, оның өз ізін басқан жас мамандар мен шәкірттерге әлі де берері көп деп есептейміз. Мехнаты ауыр ғылым мен ұстаздық жолдағы еңбегіне толайым табыс тілейміз.

Жеңіс СӘДУАҚАСҰЛЫ, 

ҚР Білім беру ісінің құрметті қызметкері, филология ғылымдарының докторы, профессор.