Сыр бойы

Өз елінің патриоты, қадірменді ақсақалымыз Ұзақбай Қарамановтың дүниеден өткені туралы хабар маған өте ауыр тиді. Бірнеше күн бұрын ағамызға телефон шалып, бірқатар мәселелер туралы ақылдасқан едім. Ал бүгін ол кісі арамызда жоқ. Ұзекең мен үшін қымбат жандардың бірі еді. Үлкен аға ретінде өмірдегі кейбір жағдайларда қалай әрекет ету туралы ақыл-кеңесін алып тұратынмын.

Мен ол кісіні 1986 жылдан бері білемін, әйтсе де, бірге жұмыс істеудің сәті кейінірек, ол кісі ҚР Мемлекеттік кеңесші қызметін атқара бастағанда мүмкін болды. Мен Қызылорда облысы бойынша Арал проблемалары жөніндегі комитеттің төрағасы қызметін атқардым. Сол кезеңде Ұзақбай Қараманұлы кеуіп бара жатқан Арал теңізінің проблемаларына байланысты республиканың барлық министрлерін шақыртқан болатын.

1992 жылы ҚР Президенті Н.Назарбаев құрғап бара жатқан Арал теңізінің қоршаған орта мен тұрғындарға зардабын азайту бағытындағы шараларды күшейтуде бірлесе іс-әрекеттерді жүзеге асыру мақсатында Орталық Азия мемлекеттерінің басшыларына ұсыныс тастағаны белгілі. 1993 жылғы 26 наурызда Орталық Азия мемлекеттері басшылары Қызылорда қаласында Саммитте бас қосып, Арал теңізі және Арал маңының экологиялық сауықтырылуы мен аймақтың әлеуметтік-экономикалық дамуын қамтамасыз ету мәселелерін шешуде бірлесе қызмет ету туралы мәлімдеме қабылдады.  Сол Саммитте Халықаралық Аралды құтқару қоры (ХАҚҚ) құрылды. Қор президенті Н.Назарбаев, қордың атқару комитетінің төрағасы болып Ұ.Қараманов сайланды.

Ұзекең өз ісінің майталманы, елінің патриоты болды, халықтың қамы үшін жұмыс істеді. Ол кісіні білетіндер қарапайымдылығы, кішіпейілділігі, адалдығы, мұқияттылығы, ұқыптылығы, жақсы әзілдесе білетін қасиеттері басым болғаны туралы айтып береді. Есте сақтау қабілеті өте мықты еді. Телефон номерлерін бір айтқаннан есіне сақтап қала алатын. Ешкімнің жетегіне кетпей, нақты аргументтер талап ететін.

Ол кісінің барлық уақыты минутына дейін есептеулі болатын. Соған қарамастан, Ұзақбай ағамыз отбасына, жақындарына уақыт таба білетін. Келіндеріне ерекше мейірімді болды. Ата ретінде немерелерін өте жақсы көрді, олардың өмірге бейімделуіне, білім алуына бағыт-бағдар беріп отыратын еді.

Міне, осындай тұлға дүниеден озып отыр. Ұзекеңнің иманы жолдас, алды пейіш, арты кеніш болсын!

Дәулет БАЯЛИМОВ,

ҚР бойынша ХАҚҚ-ның өкілетті өкілі.