Сыр бойы

Атақты шығыс ғұламасының «Өмір – керуен, адам – оның жолаушысы. Тағдыр соқпағы қайда бастаса, жүргінші сонда барады. Жол кейде шыңға, кейде құзға бастауы мүмкін. Ал қысталаң сәтте қиядан сыр бермей шығуға адамның білігі, ерік-жігері, ақыл-парасаты, адал қасиеті мен табандылығы, ең бастысы халқының сенімі мен қолдауы қажет» дегенді  оқығаным бар. Бүгінгідей Ұзекеңдей асыл текті азаматымыздан, халқының Алатаудай  айбарлы ұлынан мәңгілікке амалсыздан айырылып отырған сәтте осынау даналық тәмсіл еріксіз ойға оралып отыр.

Иә, әрбір адамның қазасы өзінің жақын-жуығына, таныс-дос, ағайын-туғанына ауыр тиетіні белгілі. Алайда бұл жолғы қаза жалпақ жұртқа, қабырғалы қауымға өзі көзінің қарашығындай қастерлеген, ал өзін ерекше сүйген елінің қабырғасына қатты батты. Олай болатыны Ұзақбай Қараманұлы өзінің барша саналы ғұмырын елі-жерінің өсіп-өркендеуіне, Тәуелсіз Қазақстанның нығаюы жолына бағыштаған, өзі өмірден өткенше ата жұрты Арал өңірінің ахуалына алаңдаған,  туған өлкесінің болашағының баянды  болуына тікелей атсалысқан  тұлға болатын.   

Ұзекеңнің жаратылысында жоғарыда шығыс ғұламасы айтқан қасиеттердің баршасы  болғаны онымен араласқан жандарға, қабырғалы еліне жақсы мәлім. Тәуелсіз Қазақстан Республикасының тұңғыш Премьер-Министрі болып егеменді еліміздің іргетасын қалауда Елбасының  сенімді серігі бола білді. Ұзақбай Қараманұлы қандай жоғары лауазымды қызметтерді атқарғанымен, ешқашан өзінің табиғи қалпынан, адамгершілігі жоғары келбетінен, адал бағытынан айныған емес.

Өзінің туған топырағы Арал өңірінің экологиялық ахуалын басты назарында ұстап, ата жұртының тұрмыс-тіршілігінің оңалуына бар күш-жігерін жұмсады. Экологиялық апат аймағы тұрғындарын әлеуметтік қорғауды көздейтін заңды жасауға, қорғауға, Арал аймағы тұрғындарына әлеуметтік қолдау тұрғысында жеңілдіктер төленуіне бірден-бір себепші болды.

Ұзекеңнің басты қасиеті – турашылдықтан таймайтын, шындықты бүкпесіз айтатын әділдігі, көзқарасына беріктігі, ұстанымына табандылығы болатын. Кезінде Арал өңіріне қаралған экологиялық апат аймағы тұрғындарына жасалған жеңілдіктерді алып тастау туралы мәселе қозғалғанда табанды түрде қарсылық танытып, дәлелдеп шыққан, сақтап қалған Ұзақбай Қараманұлы болған-ды.

«Елім деп еміренгенге уақыт жетпейді» деген. Ұзекеңнің жұмысы қаншама қарбаласқа толы болса да, елінің тағдыры сөз болған жерде қалыс қалған сәті кездескен емес. Соған орай, өзі қашанда ұлық тұтқан халқы да асыл ұлына сенім артты. Қазақстан Республикасы Парламенті Мәжілісінің қатарынан ІІ-ІІІ шақырылымының депутаты болып сайланды. Ұзақбай Қараманов енді елінің көкейіндегі сауалын, өтінішін халық қалаулысы ретінде жеткізді. Әрі қозғаған мәселелері қашанда қолдау табушы еді. Мұның өзі айтар ұсыныстарын саралап, екшеп сауатты түрде жеткізумен қатар, Ұзекеңнің Алатаудай айбарлы, биік беделінің де жемісі болатын.

Ұзекең өзіне сенім артқан қабырғалы жұртына аурухана, мектеп, стадион, емхана, өкпе аурулары диспансері, «Ақлақ» плотинасына апарар жол, тағы басқа көптеген нысандардың салынуына ықпалын тигізді. Сондай-ақ, Арал, Қазалы аудандары халқының  сапалы ауыз сумен қамтылуына да зор еңбек сіңірді. Ұзекеңнің осындай өлшеусіз еңбегінің арқасында аталған аудан тұрғындары ең таза тіршілік нәрін тұтынып отыр.

«Уақыт бәріне төреші» дейді халық даналығы. Олай болса, Ұзақбай Қарамановтай  асыл перзентінің жарқын бейнесі, ғибратты ғұмыры уақыт өткен сайын жарқырап,  кемелдене түсері анық.

Самұрат ИМАНДОСОВ,

Қызылорда облысы және 

Қазалы ауданының құрметті азаматы.