Сыр бойы

Еліміз орны толмас ауыр қайғыға душар болды. 80 жастан асқан шағында мемлекет және қоғам қайраткері, Тәуелсіз Қазақстан Республикасының тұңғыш Премьер-Министрі болған Сыр елінің аяулы перзенті Ұзақбай Қараманұлы Қараманов өмірден озды.

Ұзақбай Қараманұлы 1937 жылы тамыз айында Арал ауданы, Ұялы ауылында дүниеге келген. 1959 жылы Куйбышев (Самара) қаласындағы инженерлік құрылыс институтын бітірген. Еңбек жолын Шұбарқұдық автобазасында (Ақтөбе облысы) прораб болып бастаған ол «Қызылорда құрылыс» тресінде инженер, басқарма бастығы болып еңбек етеді. 1964 – 1980 жылдар аралығында «Алматы өнеркәсіп құрылысы» тресінде аға прораб, комбинат директоры, Қазақстан Компартиясы Орталық комитетінің Іс басқармасының қызметкері, Жеңіл және тамақ кәсіпорындары құрылысы басқармасының бастығы, Қазақ КСР Ауыр өнеркәсіп министрлігінің Алматы құрылыс Бас басқармасының және Құрылыс индустриясы Бас басқармасының бастығы қызметтерін атқарды.

1980 – 1984 жылдары Қазақ КСР Жеңіл өнеркәсіп министрінің орынбасары, «Қазақтың су тасқындарынан қорғану құрылысы» Бас басқармасының бастығы болған Ұзақбай Қараманұлы 1989 жылға дейін Қазақ КСР Құрылыс министрінің Бірінші орынбасары, Қазақ КСР Мемлекеттік жабдықтау комитетінің төрағасы қызметтерін атқарған.

1989 – 1990 жылдары Қазақ КСР Министрлер Кеңесінің төрағасы, Қазақ КСР Жоғарғы Кеңесінің 11-ші, 12-ші, 13-ші шақырылымдарының депутаты, КСРО Жоғарғы Кеңесінің депутаты, Қазақстан Компартиясы Орталық комитеті Саяси бюросының (1990-1991), Қазақ КСР Президенттік кеңесінің (1990) мүшесі атанды. Ал 1990 – 1992 жылдары Қазақ КСР, онан кейін тәуелсіз Қазақстан Республикасының тұңғыш Премьер-министрі болды.

Ұзақбай Қараманұлы Елбасы Н.Ә.Назарбаевтың бастауымен Қазақстанның өз тәуелсіздігін жариялауда және оның іргетасын қалауда сенімді серігі бола білді. Кеңестер Одағы тарап, өндірістердің шаруашылық байланыстары үзіліп, әлеуметтік мәселелер күрделенген өтпелі кезеңде Үкіметтің жауапты қызметін үйлестіруде аянбай еңбек етті.

1993 жылы Аралды құтқару Халықаралық қорының атқарушы директоры, 1994 жылы Қазақстан Республикасы Жоғарғы Кеңесінің депутаты, Табиғатты пайдалану және экология комитетінің төрағасы, 1995 – 1998 жылдарда «Қазконтракт» республикалық келісімшарт корпорациясының вице-президенті, «Қомақ-Инвест» қаржылай-кәсіпшілік тобының президенті қызметтерін атқарды. 1998 жылдан Қазақстан Республикасы Құрылысшылар одағының президенті, Қазақстан Республикасы Парламенті Мәжілісінің 2-ші және

3-ші шақырылымдарының депутаты, Аймақтық дамыту және экономикалық қайта құру комитетінің мүшесі болды.

Мемлекет және қоғам қайраткері Ұ.Қараманов ел мүддесі жолындағы қажырлы еңбегі үшін II дәрежелі «Барыс», «Еңбек Қызыл Ту» ордендерімен, Қазақ КСР Жоғарғы Кеңесінің құрмет грамоталарымен және түрлі жоғары дәрежедегі медальдармен марапатталды. КСРО Министрлер кеңесі сыйлығының лауреаты атанды.

Егемен еліміздің өсіп-өркендеуінде ерекше үлесі бар патриот және азамат, мемлекетшіл қайраткер, Ұзақбай Қараманұлы Қарамановтың өнегелі жолы мен жасаған еңбегі, жарқын бейнесі ел жадында ұзақ сақталатын болады.

Қызылорда облысының әкімдігі, облыстық мәслихат, «Нұр Отан» партиясының облыстық филиалы және облыстық қоғамдық кеңес