Сыр бойы

Қызылорда қалалық мәслихатының депутаттары Қазақстан Республикасы Парламенті Сенатының депутаттары Бекмырза Еламанов және Мұрат Бахтиярұлымен кездесті.

Сенат депутаттарымен кездесуді қалалық мәслихат хатшысы Роза Боханова ашып, жүргізді. Сонымен қатар, кездесуге қалалық мәслихат депутаттары, жергілікті атқарушы органдар өкілдері, кент және ауылдық округ әкімдері, құқық қорғау органдарының басшылары және бұқаралық ақпарат құралдарының өкілдері қатысты.

Жиын барысында Елбасының «Президенттің бес әлеуметтік бастамасы» атты халыққа үндеуінен туындайтын елдің әлеуетін арттыру бағытындағы міндеттер туралы кеңінен талқыланып, Сенат депутаттары көптің көңілінде жүрген бірқатар мәселелер бойынша қойылған сұрақтарға жауап берді.

 Елдің әлеуметтік ахуалын жақсартуды көздейтін Президенттің бес бастамасының жүзеге асырылу барысы бойынша аймағымызға арнайы іссапармен Қазақстан Республикасы Үкіметінің басшысы Бақытжан Сағынтаев келіп, бірқатар әлеуметтік, өндірістік нысандарды аралап, Үкімет мүшелерімен бірге облыс активі, атқарушы билік өкілдері және кәсіпкерлер мен әлеуметтік сала қызметкерлерінің басын қосқан кездесу жиындарын өткізді. Сондай-ақ, Қазақстан Республикасы Парламенті Мәжілісі төрағасының орынбасары Владимир Божко бастаған бірқатар мәжіліс депутаттары да қаламызда бірқатар кездесулер өткізген болатын.

Алдағы уақытта да Елбасының халық үшін қолға алған барлық бастамалары мен бағдарламаларын жүзеге асыруға бағытталған салмақты саясатын Қызылорда қалалық мәслихатының депутаттық корпусы қолдап, атқарушы билік, қоғамдық ұйымдармен бірлесе табысты үлес қоса беретін болады.