Сыр бойы

Қала орталығындағы "Орда” мейрамханасында ҚР Президентінің жаңажылдық шыршасы өтті. "Экспоның” жаңажылдық алауы” тақырыбында өткен мерекелік шараға оқуда озат, спорт пен өнерде дарынды жеткіншектер мен көпбалалы отбасы балалары жиналды.

Әсем безендірілген әсерлі шырша маңында топтасқан балалар ертегі кейіпкерлерін қошеметпен қарсы алып, аралдық оқушылардың "Қорқыт-қобыз” шығармасын, домбырашылар ансамблінің күй тартуын тыңдады. Түрлі персонаждардың еліміздің ең басты жобасы саналатын "Экспо – 2017” халықаралық көрмесі жайындағы диалогын тамашалады. Мерекенің бас кейіпкерлері Аяз ата мен Ақшақар бүлдіршіндерді Жаңа жылмен құттықтап, жылы лебізін білдірді. Мұнан кейін балалар шыршаны айнала ән салды, би биледі, өз өнерін көрсетті. Осылайша, шырша шамының жануына барын салды. Шарада әрбір балаға тәтті сыйлықтар жиынтығы, ноутбуктер табысталды. Бірақ бүлдіршіндерді қанаттандырған басқа нәрсе еді. Ең басты сый Елбасы Нұрсұлтан Әбішұлының бейнеүндеуі болды. 

– Қымбатты балалар, барлықтарыңды Жаңа жылмен шын жүректен құттықтаймын! Биылғы жыл бәріміз үшін айрықша жыл болды. Тәуелсіздіктің 25 жылдық мерейтойын қарсы алдық. Еліміз жетістіктер төрінен көріне білді, Қазақстанды әлем таныды. Алдағы уақытта мемлекет үшін маңызы жоғары "Экспо – 2017” көрмесін өткізбекпіз. Сендер осындай ерекше елде өсіп келе жатқан бақытты ұрпақсыңдар. Зерделі де зерек, ақылды да алғыр болыңдар. Бұған елімізде барлық мүмкіндік бар. Жасампаз істердің барлығы сендердің жарқын болашақтарың үшін жасалған, – деді Н.Назарбаев. 

Облыс әкімінің орынбасары Руслан Рүстемов те балдырғандарға Жаңажылдық тілегін жеткізіп, Тәуелсіздікті қастерлей білетін, Отବнын жанындай сүйетін патриот болуға шақырды. Шара соңында балалар елеулі оқиғаларымен есте қалған ескі жылмен қимай қоштасып, жаңа Тауық жылын қошеметпен қарсы алды. Ертегідей өткен кеш барлық қатысушылардың көңілінен шықты, мерекелік шырша, декорациялар мен кейіпкерлердің костюмі де көрерменге ерекше әсер қалдырды.