Сыр бойы

– Жыл басынан бері атап өтіп келе жатқан Тәуелсіздіктің 25 жылдық мерекесі өзінің шарықтау шегіне жетті. Бұл – барша қазақстандықтар мен әлемнің түкпір-түкпірінде тұрып жатқан қандастарымыз үшін ең қасиетті де қастерлі мереке,– деді облыс әкімі сөз барысында. – Алды­мыз тұманды, болашағымыз күмәнді тұс­та Жаратқанның қолдауымен, асыл халқы­мыздың ақ тілеуімен 1991 жылы 16 желтоқсанда азаттықты аңсаған бабалар арманы орындалды. Тәуелсіз Қазақстанның іргетасын қалап, шекарасын шегендеп, болашағына бағыт-бағдар берген Тұңғыш Прези­дентіміздің халыққа, елге берген еңбе­гі ұшан-теңіз. Осы жылдардағы елімізде атқарылған игі істердің барлығы да Елбасы есімімен тығыз байланысты. Тәуелсіздікке ие болғаннан бері ширек ғасыр ішінде  қол жеткізген жетістіктеріміз жетерлік. Сол жасампаз жарқын істер арқылы заманауи мемлекет құрдық. Біз – мүддесі бір, «Мәңгілік ел» деген тұжырымды айқын мақсат еткен халықпыз. Біз – өз ұстанымы, кемеңгер көшбасшысы бар береке-бірлікті мемлекетпіз. Ендеше тәңір тарту еткен Тәуелсіздігіміз тұғырлы, елдігіміз ғұмырлы болсын! – деп атап өтті аймақ басшысы. Сонымен қатар еліміздің өсіп-өркендеуіне ерек­ше үлес қосқан азаматтарды марапаттау үшін ҚР Президенті Нұрсұлтан Әбішұлы Назарбаевтың арнайы Жарлығымен «Қазақстан Республикасының Тәуелсіз­дігіне 25 жыл» мерекелік медалі та­ғайындалғанын жеткізді. Елбасы шеші­мімен отаншыл азаматтық ұстанымы, эко­номика мен әлеуметтік саланы да­мы­тудағы белсенділігі үшін, сондай-ақ руханият,  ғылым мен білімді және мәдениетті одан әрі өркендетудегі  сіңірген еңбегі үшін бірқатар Сыр елінің азаматтары марапатталғанын атап өтті. 

Мұнан соң аймақ басшысы мерекелік медальды Еңбек Ерлері Шырынкүл Қазанбаева, Сәлима Жұмабекова, Оразбай Әбішев, Аманкелді Ахметов бастаған ел ардақтыларының кеудесіне тақты. Сондай-ақ облыстық Қазақстан халқы ассамблеясы хатшылығы, облыстық Қоғамдық кеңес мүшелеріне, облыстық мәслихат депутаттарына, облыстық құқық қорғау органдары, басқарма басшыларына, басқа да мемлекеттік қызметкерлерге табыс етілді.

Салтанатты жиында Қа­зақ­­стан Республикасының «Құрмет Гра­мота­сымен» Қазалы ауданы Ғ.Мұрат­баев ауылдық округінің әкімі Берік Бейсембаев марапатталды. 

Шара соңында марапатталғандарға Сыр елінің өсіп-өркендеуіне қосқан үлесі үшін алғыс айтқан аймақ басшысы Елбасы бастауымен, халықтың қолдауымен Тәуел­сіздігімізді нығайта берейік деген тілегін жеткізді.

Дүйсенбіде, сондай-ақ, облыстық әкімдікте облыс әкімінің орынбасары Руслан Рүстемов салтанатты шара өткізді. Еліміздің ең ұлық мерекесі Тәуелсіздік күнінің халқымыз үшін қаншалықты маңызды екенін атап өтіп, ширек ғасырда қол жеткізген жетіс­тік­терімізге тоқталды. Сонымен бірге, Тәуел­сіздік мерекесінде еліміздің  өркендеуіне еңбегімен өзіндік үлес қосқан азаматтарды марапаттау дәстүрге айналғанын жеткізді. Осы ретте Елбасы Жарлығына сәйкес  «Қазақстан Республикасының Тәуелсіздігіне 25 жыл» мерекелік медалін білім, мәдениет, спорт, мұрағат және кітапхана салалары мен қоғамдық ұйымдар өкілдеріне табыс етті. Сонымен қатар, бірқатар азаматқа облыс әкімінің «Алғыс хатын» табыстап, марапат иелеріне ізгі тілектерін арнады.