Сыр бойы

 Дүниеде уақыт пен кеңістік деген ұғым бар. Адамзат өз тіршілігінің осы екі факторға тәуелді екенін ұмытып кетеді. Әлемдік пандемия сол кемшіндігімізді еске салды. Көп адам өзінің көрдім деп жүрген қиындығының желді жаңбырдай екенін ғана ұғынды. Кенеттен көтерілген коронавирус кеселі жаңбырдан емес, бұршақтан қорғанғандай қиын күйге түсірді. Сонымен бірге барлық адам баласының мүддесі бір екенін, ол – бейбіт, салауатты өмір сүріп, еңбек бақытына бөлену екенін түсіндірді.

Қиын шақта мемлекетіміз Ата заңымызда айтылғандай ең қымбат қазынасы адам және оның өмірінің кепілдігі үшін барлық сақтық шаралары мен қолдауларды бірінші кезекте іске асырды.

Карантиндік шектеу енгі­зіліп, қоғамдық орындар жұ­мысы  мен көпшілік жиындар тоқтатылды. Бұл бірден-бір дұрыс шешім болды. Олай болмаған күнде кеселдің қоғаға тиген өрттей қаулап кететіні кәміл еді. Қаншалықты шектеу қойылғанымен, мем­лекет ешкімді қиындықта қалдырмаудың тетіктерін де шешті. Азаматтар мен бизнесті қолдау үшін 6 триллион теңгеге жуық қаржының бөлінуі – осының анық айғағы. Шынайы қолдауды сезінген азаматтарымыз ат үстінен түспей, қауіпке кеудесін тосып халық қызметінде жүрді. «Көктемнің бір күні жылға азық» деген қағиданы ұстанған егіншілер науқан міндеттерін тоқтатпай, белгіленген тәртіп аясында өз жұмыстарын атқара білді.

Президент Қасым-Жомарт Тоқаев өзінің апта басындағы жа­саған мәлімдемесінде  каран­тин­дік шектеуді мамыр айының 11-не дейін ұзартуға шешім қа­был­­дағанын айтып, халықты тү­сі­ністікке шақырды. Осы кезең­нің асыл мұраты  шыдам мен төзім, са­быр мен қанағат екенін еске салды.

Сонымен бірге оқу орын­дары мен мектептердің қашық­тан оқытуды жалғастыра бере­тіні айтылды. Мен ғы­лыми жетекшілік жасайтын «Болашақ» университеті мұн­дай қадамға бұрыннан да дайын болатын. Біздің сту­дент­теріміздің 30 проценті қашықтан оқуға әлдеқашан үйренген. Жақында «facebook» әлеуметтік желісі ар­қы­лы студенттерге мем­лекет­тік сынақтардың қашықтан алы­натынын тағы бір пысықтадық. Бұл тәсіл бойынша алдымен студентке үш сұрақ жіберіледі, ол жауабын 45 минут ішінде кері қайтаруға тиіс. Оның жауап беру сәті қажетті жағдайда тексеріледі, сонымен бірге көшірілмегендігі жөнінен «антиплагиаттық» сүзгіден өтеді. Біз бұл бағдарламаны Мәскеуден алдырған едік. Қазір оның оқытушыға да, студентке де тиімді екені көрініп отыр. Шәкірт еркін жауап беруге дағдыланады және ешқандай қысымға ұшырамайды.

Дәл осы секілді бүгінде мекемелер мен кәсіп­орын­дардың басым бөлігі қашықтан жұмыс істеу тәсілін меңгеру үстінде. Мұны алдағы уақытта да жалғастыруға тұрарлық әдіс деп есептеймін.

Президент өз мәлім­демесінде «Халықтың қауіп­сіздігі үшін жан­кештілік танытып жүрген дәрігерлер мен медицина қыз­меткерлеріне, құқық қорғау органдарының өкілдеріне және әскери қызметшілерге алғыс айтамын. Қауіп-қатерге қарамай мұқтаж жандарға көмек қолын созған волонтерлерге де ризашылық білдіремін. Сондай-ақ, халыққа жедел және шынайы ақпарат таратып жүрген журналистер қауымына алғыс айтамын», – деп ризашылық сезімін паш етті.

Ал, енді осы жанкешті еңбекті бағаламай, тәртіпті белден басып, шектеу ереже­леріне бағынбай жүр­ген қисық-қыңырлар да бар. «Қисық арба жол бұзар, қыңыр адам ел бұзар» дейді халқымыз. Дәл осы күні өзіңе жақсылық жасау арқылы өзгеге де жақсылық жасаудың маңызы артып тұр. Талап пен тәртіпке мойынсұнуды біз жеке бастың шектеуі емес, кеселдің кең жайылып кетпеуіне қосып жатқан үлесім деп білуіміз керек. Бүгінгі таңда әлемдік ақпар коронавирус жұқтырғандар санын 3 миллионға жетті деп отыр. Жер бетіндегі жеті миллиард адамның бірі өзіміз екенімізді, олардан жұмысымыз бөлек болғанмен, тынысымыз ортақ екенін естен шығармауымыз қажет. Егер терең ойлап қарасақ, осы күндердегі жеке іс-қимылымызбен келешек ұрпаққа қызмет етіп жатқа­нымызды сезінер едік.

Бастан өткеріп отырған кезеңнің сипатын санамен ұғатын көпшілік қауым мұны бұратартатындарға барынша түсіндіре білейік. «Әр нәрсенің бір қайыры бар» демеуші ме еді, мұсылман. Сол айтқандай, алдымызда жақсы, жарқын күн­деріміздің күтіп тұрғаны күмәнсіз.